ଗଙ୍ଗା ମହିମା ଅଥବା ଗଙ୍ଗାୟାତ୍ରା ବିଧି

 ଗଙ୍ଗା ମହିମା ଅଥବା ଗଙ୍ଗାୟାତ୍ରା ବିଧି

ଗଙ୍ଗାୟାତ୍ରାଂ ଚରେନ୍ମର୍ତ୍ୟୋ ମନ ଉତ୍କଣ୍ଠତେ ଯଦା ।
ସ୍ନାତ୍ୱା ଦେବାନୃଷୀଂଶ୍ଚୈବ ପିତୄଂଶ୍ଚୈବ ଯମର୍ଚ୍ଚୟେତ୍ ॥ ୧॥

ପିଧାୟ ବାସସୀ ଶୁକ୍ଲେ ପ୍ରାଣାୟାମଂ ସମାଚରେତ୍ ।
ମୈଥୁନଂ କଲହଂ ହିଂସାଂ ବର୍ଜୟେଦ୍ଗାଙ୍ଗୟାତ୍ରୟା ॥ ୨॥

ବାସଶ୍ଚ ମଲିନଂ ନୈବ ଗୃହ୍ଣୀୟାଦ୍ଗାଙ୍ଗୟାତ୍ରିକଃ ।
ଗୁରୁଂ ଗଣେଶଂ ବିଷ୍ଣୁଞ୍ଚ ଶିବଂ ଦୁର୍ଗାଂ ସରସ୍ୱତୀମ୍ ॥ ୩॥

ଗୋବ୍ରାହ୍ମଣସତୀଶ୍ଚୈବ ପ୍ରଣମେଦ୍ଗାଙ୍ଗୟାତ୍ରିକଃ ।
ଗୁରବଃ ପିତରୋ ଦେବା ଦିକ୍ପାଲାଶ୍ଚ ଗ୍ରହାସ୍ତଥା ॥ ୪॥

ଋଷୟଶ୍ଚାରଣାଃ ସିଦ୍ଧାଃ ଗନ୍ଧର୍ୱାଃ କିନ୍ନରାସ୍ତଥା ।
ସର୍ୱା ଦେବ୍ୟଶ୍ଚ ଦେବାନାଂ ପ୍ରଣମ୍ୟନ୍ତେ ମୟାଧୁନା ॥ ୫॥

ଗଙ୍ଗାସ୍ନାନାର୍ଥଚାତ୍ରାୟା ଭବନ୍ତୁ ମମ ସାଧକାଃ ।
ଇତ୍ୟେବଂ ମନ୍ତ୍ରମୁଚ୍ଚାର୍ୟ୍ୟ ଗଙ୍ଗାୟାତ୍ରାଂ ସମାଚରେତ୍ ॥ ୬॥

ଗଙ୍ଗେ ଦେବି ଲୋକମାତର୍ୱିଘ୍ନୋତ୍ସାରିଣି ତେ ନମଃ ।
ତ୍ୱଦ୍ଦର୍ଶନାୟ ସଦ୍ୟାତ୍ରାଂ କରୋମ୍ୟତ୍ରାନୁମୋଦୟ ॥ ୭॥

ଇତ୍ୟେବଂ ମନ୍ତ୍ରମୁଚ୍ଚାର୍ୟ୍ୟ ଗଙ୍ଗାୟାତ୍ରାଂ ସମାଚରେତ୍ ।
ବିଲ୍ୱଞ୍ଚ ତୁଲସୀଞ୍ଚୈବ ପ୍ରଣମ୍ୟ ଭକ୍ତିସଂୟୁତଃ ॥ ୮॥

ବିଲ୍ୱପତ୍ରମୁପାଘ୍ନାୟ ଗଙ୍ଗାୟାତ୍ରାଂ ସମାଚରେତ୍ ।
ଶୟନେ ଭୋଜନେ ଦାନେ ପଥି ରାତ୍ରୌ ଦିବା ତଥା ॥ ୯॥

ଗଙ୍ଗା ଗଙ୍ଗେତି ସଂସ୍ମୃତ୍ୟ କାଲଂ ସଂୟାପୟେନ୍ନରଃ ।
ଗଙ୍ଗାୟାତ୍ରାଂ ସମାସାଦ୍ୟ ପଥି ଚେନ୍ମ୍ରିୟତେ ଜନଃ ॥ ୧୦॥

ଗଙ୍ଗାମୃତ୍ୟୁଫଲଂ ତସ୍ୟ ଭବତ୍ୟେବ ନ ସଂଶୟଃ ।
ଗଙ୍ଗାୟା ଦର୍ଶନେ ଦେବା ଆଚରନ୍ତି ବିରୋଧନମ୍ ॥ ୧୧॥

ଯେନାସାବବଗାହ୍ୟୈନାଂ ନାସ୍ମାଭିଃ ସମତାମିୟାତ୍ ।
କୃତଗଙ୍ଗାର୍ଥୟାତ୍ରସ୍ୟ ଶରୀରେ ପାପସଞ୍ଚୟାଃ ॥ ୧୨॥

ଭବନ୍ତି ବିକଲାଃ ସର୍ୱେ ତମାଂସୀବ କ୍ଷପାତ୍ୟଯେ ।
ତେ ପି ବିଘ୍ନାନାଚରନ୍ତି ଯେନାସୌ ନୈବ ଗଚ୍ଛତୁ ॥ ୧୩॥

ଗଙ୍ଗାୟା ବାୟୁସଂସର୍ଗଂ ପ୍ରାପ୍ୟ ପାପୈର୍ୱିମୁଚ୍ୟତେ ।
ତଦା ବିରୋଧଂ ବୈ ଦେବା ଆଚରନ୍ତ୍ୟସ୍ୟ ଗଚ୍ଛତଃ ॥ ୧୪॥

ଗଙ୍ଗାବାୟୋସ୍ତୁ ସଂସର୍ଗେ ପଠେତ୍ସ୍ତବମିମଂ ନରଃ ।
ସର୍ୱଦେବେଶ୍ୱରୋ ଯେନ ପରିତୁଷ୍ୟତି କେଶବଃ ॥ ୧୫॥

ସ୍ୱେ ମହିମ୍ନି ସ୍ଥିତଂ ଦେବମପ୍ରମେୟମଜଂ ବିମୁମ୍ ।
ଶୋକମୋହବିନିର୍ମୁକ୍ତଂ ଧ୍ୟାୟେ ବିଷ୍ଣୁଂ ସନାତନମ୍ ॥ ୧୬॥

ଆସନାଦ୍ୟୈରସଂସ୍ପୃଷ୍ଟଂ ସେବିତଂ ଯୋଗିଭିଃ ସଦା ।
ନିର୍ଗୁଣଂ ସର୍ୱଗଂ ଶାନ୍ତଂ ଧ୍ୟାୟେ ବିଷ୍ଣୁଂ ସନାତନମ୍ ॥ ୧୭॥

ସର୍ୱଦୋଷବିନିର୍ମୁକ୍ତଂ ସୁପ୍ରଭାବଂ ସୁନିର୍ମଲମ୍ ।
ନିଷ୍କଲଂ ଶାଶ୍ୱତଂ ଦେବଂ ଧ୍ୟାୟେ ବିଷ୍ଣୁଂ ସନାତନମ୍ ॥ ୧୮॥

ଅତୁଲଂ ସୁଖଧର୍ମାଣାଂ ବ୍ୟୋମଦେହଂ ସନାତନମ୍ ।
ଧର୍ମାଧର୍ମସମାୟୁକ୍ତଂ ଧ୍ୟାୟେ ବିଷ୍ଣୁଂ ସନାତନମ୍ ॥ ୧୯॥

କ୍ଷରାକ୍ଷରବିନିର୍ମୁକ୍ତଂ ଜନ୍ମମୃତ୍ୟୁବିବର୍ଜନମ୍ ।
ଅଭୟଂ ସତ୍ୟସଙ୍କଲ୍ପଂ ଧ୍ୟାୟେ ବିଷ୍ଣୁଂ ସନାତନମ୍ ।
ଅମୃତଂ ସାଧନଂ ସାଧ୍ୟଂ ଯଂ ପଶ୍ୟନ୍ତି ମନୀଷିଣଃ ॥ ୨୦॥

ଜ୍ଞେୟାଖ୍ୟଂ ପରମାତ୍ମାନଂ ଧ୍ୟାୟେ ବିଷ୍ଣୁଂ ସନାତନମ୍ ।
ବ୍ୟାସାଦ୍ୟୈରୃଷିଭିଃ ସର୍ୱୈର୍ଧ୍ୟାନୟୋଗପରାୟଣୈଃ ॥ ୨୧॥

ଅର୍ଚ୍ଚିତଂ ଭାବକୁସୁମୈର୍ଧ୍ୟାୟେ ବିଷ୍ଣୁଂ ସନାତନମ୍ ।
ବିଷ୍ଣ୍ୱଷ୍ଟକମିଦଂ ପୁଣ୍ୟଂ ଯୋଗୀନାଂ ହର୍ଷଦାୟକମ୍ ॥ ୨୨॥

ଯଃ ପଠେତ୍ପରୟା ଭକ୍ତ୍ୟା ସ ବିଷ୍ଣୁତୁଲ୍ୟତାମିୟାତ୍ ।
ବିଷ୍ଣୁତୁଲ୍ୟସ୍ତଦା ଭୂତ୍ୱା ଗଙ୍ଗାଂ ପଶ୍ୟେଦନନ୍ୟଥା ॥ ୨୩॥

ଦୃଷ୍ଟ୍ୱା ଗଙ୍ଗାଂ ମହାପୁଣ୍ୟାଂ ପ୍ରଣମେଦ୍ଦଣ୍ଡବନ୍ମୁଦା ।
ଗଙ୍ଗେ ଦେବି ଜଗନ୍ମାତଃ ଶିବଶୀର୍ଷକୃତାଲୟେ ॥ ୨୪॥

ଜନ୍ମୈତତ୍ସଫଲମ୍ମେଽସ୍ତୁ ଭବତୀଂ ପ୍ରଣମାମ୍ୟହମ୍ ।
ଏତେନ ଖଲୁ ମନ୍ତ୍ରେଣ ହ୍ୟଷ୍ଟାଙ୍ଗୈଃ ପ୍ରଣମେଚ୍ଛିବାମ୍ ॥ ୨୫॥

ସ୍ମୃତାସି ଗଙ୍ଗେ ଦୃଷ୍ଟାସି ସ୍ପୃଶାମି ତ୍ୱାଂ ମହେଶ୍ୱରୀମ୍ ।
ବିଷ୍ଣୁଦେହଦ୍ରବାକାରେ ପ୍ରସୀଦ ଜଗଦମ୍ବିକେ ॥ ୨୬॥

ଏତେନ ଖଲୁ ମନ୍ତ୍ରେଣ ସ୍ପୃଶେଦ୍ଦେବୀଂ ସନାତନୀମ୍ ।
ତତୋ ଦ୍ୱିବାସାଃ ସ୍ନାୟାଚ୍ଚ ଇଷ୍ଟଦେବପ୍ରିୟାର୍ଥକଃ ॥ ୨୭॥

ମଜ୍ଜନ୍ତି ଯେଽସ୍ମିନ୍କିଲ ଦେହଭାଜୋ ନ ତେ ନିମଜ୍ଜନ୍ତି ପୁନର୍ଭବାବ୍ଧୌ ।
ସୋଽୟଂ ପୁରସ୍ତାତ୍ପୟସାଂ ପ୍ରଭାବୋ ଗଙ୍ଗେତି ଯଂ ଗାୟତି ବେଦବର୍ଗଃ ॥ ୨୮॥

ଆବାହନଞ୍ଚ ତୀର୍ଥାନାଂ ନାପେକ୍ଷ୍ୟଂ ଜାହ୍ନବୀଜଲେ ।
ନିଃସଙ୍କଲ୍ପୋଽପିୟଃ ସ୍ନାୟାତ୍ସ ଚ ପାପୈର୍ୱିମୁଚ୍ୟତେ ॥ ୨୯॥

ଦେବର୍ଷିପିତୃଲୋକାନାଂ ତର୍ପଣଂ ବିଧିତଶ୍ଚରେତ୍ ।
ସମ୍ପୂଜୟେଦିଷ୍ଟଦେବଂ ଚିନ୍ତାନ୍ତରପରାଙ୍ମୁଖଃ ॥ ୩୦॥

ଗଙ୍ଗାତୀରେ ବସେନ୍ମର୍ତ୍ୟସ୍ତ୍ରିରାତ୍ରମପି ନାନ୍ୟଥା ।
ଯଂ କ୍ଷଣଂ ତତ୍ର ବସତି ସ ଏବ ସାର୍ଥକଃ କ୍ଷଣଃ ॥ ୩୧॥

ଗମନେ ପ୍ରାର୍ଥୟେଦ୍ଦେବୀଂ ପୁନର୍ଦର୍ଶନକାମ୍ୟଯା ।
ମାତ୍ରା ପିତ୍ରା ଦୁହିତ୍ରା ବା ଭାର୍ୟ୍ୟାପୁତ୍ରଧନାଦିଭିଃ ॥ ୩୨॥

ତ୍ୟକ୍ତସ୍ୟ ନ ତଥା ଦୁଃଖଂ ଯଥା ଗଙ୍ଗାବିୟୋଗଜମ୍ ।
ନୈବ ସ ସ୍ୟାତ୍କ୍ଷଣୋ ବ୍ରହ୍ମନ୍ୟତ୍ର ଗଙ୍ଗା ନ ବିଦ୍ୟତେ ॥ ୩୩॥

ନ ଗମ୍ୟତେ ଚ ଦେଶୋଽସୌ ଯତ୍ର ଗଙ୍ଗା ନ ବିଦ୍ୟତେ ।
ଏକପାଦସ୍ଥିତୋ ଯସ୍ତୁ ତପତ୍ୟଯୁତବତ୍ସରାନ୍ ॥ ୩୪॥

ଦଣ୍ଡମାତ୍ରନ୍ତୁ ଗଙ୍ଗାୟାଂ ବସେତ୍ସ ତୁ ବିଶିଷ୍ୟତେ ।
ଏବନ୍ତୁ ଦଣ୍ଡସଙ୍ଖ୍ୟାଭିର୍ମାସପକ୍ଷାଦିବାସତଃ ॥ ୩୫॥

ଫଲଂ ଦତ୍ତେ ଭଗବତୀ ଗଙ୍ଗାବାସିଜନାୟ ବୈ ।
ଯାନ୍କାଲାନ୍ସ୍ୱର୍ଧୂନୀତୀରେ ବସେନ୍ମର୍ତ୍ୟଃ ସମାହିତଃ ॥ ୩୬॥

ତାବଦେବାସ୍ୟ ପିତରୋ ଦେବାଶ୍ଚ ପରିତୋଷିତାଃ ।
ତାବତ୍ତୁ ବ୍ରହ୍ମଚର୍ୟ୍ୟେଣ କାଲଂ ସଂୟାପୟେଦ୍ୱିଜ ॥ ୩୭॥

ତାବଦେବ ପରସ୍ୟାନ୍ନଂ ନ ଭୁଞ୍ଜୀତ କଦାଚନ ।
ତୈର୍ଦତ୍ତଞ୍ଚ ନ ଗୃହ୍ଣୀୟାତ୍ପରନିନ୍ଦାଂ ନ ଚାଚରେତ୍ ॥ ୩୮॥

ଗଙ୍ଗାତୀରସ୍ଥିତୋ ଯସ୍ତୁ ପରନିନ୍ଦାଂ ସମାଚରେତ୍ ।
ସର୍ୱଭୂତମୟୋ ବିଷ୍ଣୁସ୍ତସ୍ମୈ କ୍ରୁଦ୍ଧେଽତ୍ ପରାଙ୍ମୁଖଃ ॥ ୩୯॥

ଗଙ୍ଗାସ୍ନାନାର୍ଥମାଗତ୍ୟ ଯୋ ଗୃହ୍ଣାତି ଗୃହୀଜନଃ ।
ତଣ୍ଡୁଲଂ ବା ସୁବର୍ଣଂ ବା ବସ୍ତ୍ରାଦିଂ ବା କଦାଚନ ॥ ୪୦॥

ନ ତସ୍ୟ ଫଲସିଦ୍ଧିଃ ସ୍ୟାତ୍ସମ୍ୟଗ୍ଗଙ୍ଗା ପ୍ରୟୋଜନମ୍ ।
ସ ପଙ୍ଗୁଃ ସ ସଦା କାଣଃ ସ ଏବ ପାପରାଶିମାନ୍ ॥ ୪୧॥

ଯୋ ଗଙ୍ଗାନିକଟଂ ପ୍ରାପ୍ୟ ଗଙ୍ଗାସ୍ନାନମୁପେକ୍ଷତେ ।
ସାୟଂ ପ୍ରାତଶ୍ଚ ମଧ୍ୟାହ୍ନେ ଦ୍ରଷ୍ଟବ୍ୟା ତୀରବାସିଭିଃ ॥ ୪୨॥

ଗଙ୍ଗାତୀରାଦ୍ଗତୋ ଦୂରଂ ନ ସ୍ନାତ୍ୱା ଯସ୍ତୁ ଜାହ୍ନବୀମ୍ ।
ବ୍ରହ୍ମହୟାଦିଭିଃ ପାପୈସ୍ତତ୍କ୍ଷଣାତ୍ ସ ପ୍ରଲିପ୍ୟତେ ॥ ୪୩॥

ଗଙ୍ଗାସ୍ନାନରତଂ ମର୍ତ୍ୟଂ ଗଙ୍ଗାତୀରନିବାସିନମ୍ ।
ପୂଜୟିତ୍ୱା ଯଥାନ୍ୟାୟମଶ୍ୱମେଧଫଲଂ ଲଭେତ୍ ॥ ୪୪॥

ଅଗଙ୍ଗଦେଶବାସୀ ଯୋ ଭଗ୍ନରାଗୋ ଦ୍ୱିଜର୍ଷଭ ।
ନ ଗଙ୍ଗାମାଶ୍ରୟେଦ୍ଦେବୀଂ ପରଃ ସ ବିଧିବଞ୍ଚିତଃ ॥ ୪୫॥

ଗ୍ରାମଜନପଦାଃ ଶୈଲା ଆଶ୍ରମାଃ ଶୁଚୟୋ ହିତେ ।
ଯେଷାଂ ଭାଗୀରଥୀ ଗଙ୍ଗା ମଧ୍ୟେ ଯାତି ସରିଦ୍ୱରା ॥ ୪୬॥

ମାନୁଷ୍ୟଂ ଦୁର୍ଲଭଂ ପ୍ରାପ୍ୟ ବିଦ୍ୟୁତ୍ସମ୍ପାତଚଞ୍ଚଲମ୍ ।
ଗଙ୍ଗାଂ ଯଃ ସେବତେ ସୋଽତ୍ର ବୁଦ୍ଧେଃ ପାରଂ ପରଂ ଗତଃ ॥ ୪୭॥

କୃତପୁଣ୍ୟା ମହାତ୍ମାନୋ ଦେବଲୋକପ୍ରପୂଜିତାଃ ।
ସହସ୍ରସୂର୍ୟ୍ୟପ୍ରତିମାଂ ଗଙ୍ଗାଂ ପଶ୍ୟନ୍ତି ତେ ଭୁବି ॥ ୪୮॥

ସାଧାରଣଜଲାପୂର୍ଣାଂ ସାଧାରଣନଦୀମିବ ।
ପଶ୍ୟନ୍ତି ନାସ୍ତିକା ଗଙ୍ଗାଂ ପାପୋପହତଲୋଚନାଃ ॥ ୪୯॥

ଅଗଙ୍ଗବାସଂ ସନ୍ତ୍ୟଜ୍ୟ ଯୋ ଗଙ୍ଗାବାସମାବ୍ରଜେତ୍ ।
ସ ହି ବୁଦ୍ଧିମତାଂ ଶ୍ରେଷ୍ଠୋ ଦେବୈରପି ସୁଦୁର୍ଲଭଃ ॥ ୫୦॥

ପୈତୃକୀ ବସତିର୍ୟସ୍ୟ ଗଙ୍ଗାତୀରେ ଦ୍ୱିଜର୍ଷଭ ।
ମନୁଷ୍ୟଚର୍ମ୍ମଣା ନଦ୍ଧଃ ସ ଶିବୋ ନାତ୍ର ସଂଶୟଃ ॥ ୫୧॥

ଗଙ୍ଗାତୀରନିବାସାୟ କନ୍ୟାଂ ଦତ୍ତେ ତୁ ଯଃ ଶୁଭାମ୍ ।
ପ୍ରତ୍ୟହଂ ପିତରସ୍ତସ୍ୟ ଗୟାଶ୍ରାଦ୍ଧସ୍ୟ ଭୋଗିନଃ ॥ ୫୨॥

ଗଙ୍ଗାତୀରନିବାସାୟ ଯୋ ଭୂମିଂ ପ୍ରଦଦାତି ବୈ ।
ସ୍ୱର୍ଗରାଜ୍ୟଂ ସ ଭୁଙ୍କ୍ତେ ବୈ ଯାବଦିନ୍ଦ୍ରାଶ୍ଚତୁର୍ଦ୍ଦଶ ॥ ୫୩॥

କୃତାପରାଧଞ୍ଚ ନରଂ ଗଙ୍ଗାତୀରନିବାସିନମ୍ ।
ଯସ୍ତାଡ଼ୟେଦ୍ୱଚୋଦଣ୍ଡୈସ୍ତସ୍ୟ ପାପଫଲଂ ଶୃଣୁ ॥ ୫୪॥

ବିମୁଖାସ୍ତସ୍ୟ ବୈ ଦେବାଃ ପିତରଶ୍ଚାପ୍ୟୁପୋଷିତାଃ ।
ଗଙ୍ଗା ପରିତ୍ୟଜେତ୍ତଂ ବୈ ସୋଽଗତିଶ୍ଚିରନାରକୀ ॥ ୫୫॥

ଗଙ୍ଗାତୀରାଲୟଂ ମର୍ତ୍ୟଂ ସୂର୍ୟ୍ୟତୁଲ୍ୟଂ ଯ ଈକ୍ଷତେ ।
ତସ୍ୟୈବ ବିମଲଂ ଚକ୍ଷୁର୍ଦେବଦର୍ଶନସାଧନମ୍ ॥ ୫୬॥

ଗଙ୍ଗାତୀରାଲୟାନ୍ଲୋକାନ୍ଗଙ୍ଗାଲୋକାନ୍ୱଦେତ ଯଃ ।
ସ ଏବାନୁଗୃହୀତଃ ସ୍ୟାଦ୍ଗଙ୍ଗୟା ଦ୍ୱିଜପୁଙ୍ଗବ ॥ ୫୭॥

ଗଙ୍ଗାତୀରାଲୟାନ୍ମର୍ତ୍ୟାନ୍ଦେବୈରର୍ୟାନ୍କୁଧୀର୍ଜନଃ ।
ମନୁଷ୍ୟବୁଦ୍ଧ୍ୟା ପାପିନ୍ୟା ଜୈମିନେ ହ୍ୟବମନ୍ୟତେ ॥ ୫୮॥

ଦେବା ମନୁଷ୍ୟରୂପେଣ ଗଙ୍ଗାତୀରେ ଚରନ୍ତି ବୈ ।
ତସ୍ମାତ୍ତାନ୍ନାବମନ୍ୟେତ ଶ୍ରେୟୋର୍ଥୀ ନ କଦାଚନ ॥ ୫୯॥

ଗଙ୍ଗାତୀରଦ୍ୱୟେ ବିପ୍ର ପିଶାଚାଶ୍ଚ ଶିବାଜ୍ଞୟା ।
କୋଟୟଃ ପଞ୍ଚଲକ୍ଷାଣି ତିଷ୍ଠନ୍ତି ବାୟୁରୂପିଣଃ ॥ ୬୦॥

ଶୃଣୁ ତେଷାଞ୍ଚ କର୍ମ୍ମାଣି ଯଦର୍ଥେ ତେ ନିରୂପିତାଃ ।
ଯେ ତତ୍ର ପାପକର୍ମ୍ମାଣୋ ଗଙ୍ଗାତୀରେ ଦ୍ୱିଜର୍ଷଭ ॥ ୬୧॥

ତ୍ୟଜନ୍ତି ବିଷ୍ଠାମୂତ୍ରାଣି ଶ୍ଲେଷ୍ମକେଶନଖାଦି ଚ ।
ତତ୍ରୈବ ତାଂସ୍ତେ ସର୍ୱାଣି ଭୋଜୟନ୍ତ୍ୟନୁରୂପତଃ ॥ ୬୨॥

ଯେ ମିଥ୍ୟାବାଦିନୋ ଦୁଷ୍ଟା ଗୁରୁସେବାପରାଙ୍ମୁଖାଃ ।
ବୃଥା ହିଂସାରତାଃ କ୍ରୂରା ବିଶ୍ୱାସଘାତିନସ୍ତଥା ॥ ୬୩॥

ତାଂସ୍ତେ ଗଙ୍ଗାପିଶାଚା ବୈ ମୁମୂର୍ଷୂନ୍ଗାଙ୍ଗରୋଧସି ।
କ୍ଷେତ୍ରାନ୍ନାରାୟଣାନ୍ନୀତ୍ୱା ସ୍ଥାପୟନ୍ତି ନଭଃସ୍ଥଲେ ॥ ୬୪॥

ଶୂନ୍ୟେ ସନ୍ତ୍ୟଜ୍ୟ ପ୍ରାଣାଂସ୍ତେ ଯାନ୍ତି ଦୁର୍ଗତିମୁତ୍ତମାମ୍ ।
ତନ୍ନ ପଶ୍ୟନ୍ତି ପାପିଷ୍ଠାଃ ପଶ୍ୟନ୍ତି ଦିବ୍ୟଚକ୍ଷୁଷଃ ॥ ୬୫॥

ଜୈମିନେ ବର୍ଣୟାମ୍ୟସ୍ୟ ଲକ୍ଷଣାନି ନିବୋଧ ମେ ।
ଶନିମଙ୍ଗଲବାରେ ବା ନିଶୀଥେ ଲୁପ୍ତବୋଧନଃ ॥ ୬୬॥

ବିଷ୍ଠାମୂତ୍ରଂ ତ୍ୟଜନ୍ଭୂରି ଚିରରୋଗୀ ବହୂନପି ।
ବାସରାନ୍ଲୁପ୍ତସଙ୍ଗଶ୍ଚ ସଦାଘୂର୍ଣିତଲୋଚନଃ ॥ ୬୭॥

ଊଦ୍ଧର୍ୱଶ୍ୱାସୋ ହୃଷ୍ଟଦେହୋ ଗତସର୍ୱେନ୍ଦ୍ରିୟାଶୟଃ ।
ଯୋ ମ୍ରିୟେତ ସ ଏବାୟଂ ପିଶାଚୈର୍ୟସ୍ତୁ କ୍ଷିପ୍ୟତେ ॥ ୬୮॥

ଗଙ୍ଗାଭୈରବନାମନଃ ସନ୍ତ୍ୟନ୍ୟେ ଶିବକିଙ୍କରାଃ ।
ତେ ରକ୍ଷନ୍ତି ସଦା ଗଙ୍ଗାଂ ନାନାରୂପବିହାରିଣଃ ॥ ୬୯॥

ତେ ତୁ କୁର୍ୱନ୍ତି କର୍ମ୍ମାଣି ତାନି ବିପ୍ର ନିବୋଧ ମେ ।
ଯାନ୍ୟଦତ୍ତାନି ପୁଷ୍ପାଣି ନୈବେଦ୍ୟାଦୀନି ଯାନି ଚ ॥ ୭୦॥

ଗଙ୍ଗାପ୍ରବାହସ୍ପୃଷ୍ଟାନି ଗୃହୀତ୍ୱା ତାନି ତେ ଶିବାମ୍ ।
ପୂଜୟନ୍ତି ମହାଭାଗ ଶିବବିଷ୍ଣ୍ୱାଦିକାନପି ॥ ୭୧॥

ବସ୍ତ୍ରନିଷ୍ପୀଡ଼ୈତଂ ବାରି ତ୍ୟକ୍ତଂ ଚାଧୋଽଂଶୁକଂ ଜଲେ ।
ଗୃହ୍ଣନ୍ତି ଶିରମା ତେ ବୈ ଗଙ୍ଗାପାତାଭିଶଙ୍କୟା ॥ ୭୨॥

ମଦମାତ୍ସର୍ୟ୍ୟହିଂସାଦିୟୁକ୍ତାନ୍ଦୁଷ୍ଟଧିୟୋ ଜନାନ୍ ।
ଦୂରୀକୁର୍ୱନ୍ତି ତେ ଦେବା ଯତ୍ତେ ସ୍ୟୁରନ୍ୟତୋ ମୃତାଃ ॥ ୭୩॥

॥ ଇତି ଗଙ୍ଗାଜ୍ଞାନମ୍ ॥

॥ ବୃହଦ୍ଧର୍ମପୁରାଣମ୍ । ମଧ୍ୟଖଣ୍ଡଃ । ଅଧ୍ୟାୟଃ ୫୫ - ଗଙ୍ଗାଧର୍ମଃ ॥