ଗଙ୍ଗାପୁଷ୍ପାଞ୍ଜଲିଃ ଶ୍ରୀମଦ୍ଗୁରୁଣା ବିରଚିତଃ

 ଗଙ୍ଗାପୁଷ୍ପାଞ୍ଜଲିଃ

ଶ୍ରୀଗଣେଶାୟ ନମଃ ।
ସ୍ୱୟଂ ଶୁକ୍ଲା ଶୁକ୍ଲାଭରଣବସନା ଜହ୍ନୁତନୟେ
ଦ୍ୟୁତିଂ ବାଚାଂ ଦେବୀ ତବ ନ କଲୟାପ୍ତୁଂ ପ୍ରଭୁରଭୂତ୍ ।
ଅତୋ ରୂପଂ ଲବ୍ଧୁଂ ସୁକବିବଦନାମ୍ଭୋଜଜନିତୈ
ବିର୍ଧତ୍ତେ ବାଗ୍ଗୁମ୍ଫୈର୍ଜନନି ! ପଦପୁଷ୍ପାଞ୍ଜଲିମସୌ ॥ ୧॥

କଦାଚିତ୍କେନାପି କ୍ୱଚିଦପି ସମାନୀତ୍ତମମଲଂ
ପିବନ୍ତଃ ପାନୀୟଂ ତବ ଜନନି ! ମୀନାସନଗତେ ! ।
ବହନ୍ତସ୍ତ୍ୱାଂ ଗଙ୍ଗେ! ଶିରସି କିଲ ହାଲାହଲଭୁଜୋ
ଲଭନ୍ତେ ତେ ଲୋକେ ଶମନଦମନାନ୍ନାତ୍ର ଶମନମ୍ ॥ ୨॥

ସଦାବୃତ୍ତାସ୍ତୁଙ୍ଗାନ୍ ଭୁବି ବିୟତି ଧାରାଗତିଧରାନ୍
ତରଙ୍ଗାନ୍ ଗଙ୍ଗାୟାଃ ସୁତରଲତୁରଙ୍ଗାକୃତିଧରାନ୍ ।
ବିଚିତ୍ରା ବୀକ୍ଷ୍ୟୈତେ ବିଷୟଗତୟୋ ବୃତ୍ତିନିବହା
ସ୍ତ୍ରପାଧୀନା ପୀନା ଅପି ଜହତି ଦୀନାଶ୍ଚପଲତାମ୍ ॥ ୩॥

କୃପାସିନ୍ଧୁଃ ସିନ୍ଧୁଂ କିମୁତ ଭବତୀମତ୍ର ଭବତୀ
ପ୍ରପାଂ ପୀୟୂଷସ୍ୟ ପ୍ରତିଦିନମୁମେଶୋ ବିତନୁତେ ।
ଅଥୋ ରୂପଂ କୃତ୍ୱା ଜଗତି ଜନତାତାରଣପଟୁଃ
ସ୍ୱୟଂ ମାୟୋତ୍ତୀର୍ଣା ସୁରନଦି ! ସୁଧାଧାମଶିରସଃ ॥ ୪॥

ପୁରା ଧୃତ୍ୱା ପାତ୍ରେ ତ୍ରିଭୁବନ-ବିଧାତା ବିଧିରଭୂ
ଦିତି ଜ୍ଞାତ୍ୱା ପାଥଃ ଶିରସି ପଶୁନାଥସ୍ତବ ଦଧୌ ।
᳚ଦେ ଜାନେ ଜ୍ଞାନାତ୍ସୁରନଦି ! ପୁରାଣସ୍ତୁ ପୁରୁଷଃ
ଶରତ୍ପାଥୋନଷ୍ଟା ସୁମତିରିତି ତଥ୍ୟଂ ଜନବଚଃ ॥ ୫॥

ଅରିତ୍ରଂ ନୋ ଯସ୍ୟାଂ ନହି ଗୁଣଧରୋ ନାବିକଗଣଃ
ପରଂ ପାରଂ ନାରଂ ନୟତି ନ ପୁନର୍ୟାତି ନନୁ ଯା ।
ଅସାରେ ସଂସାରେ ଜଲଧିବଦପାରେ ନିପତିତାନ୍
ଜନାନୁଦ୍ଧର୍ତୁଂ ସା ତରିରିୟମପୂର୍ୱା ବିଜୟତେ ॥ ୬॥

ବିଶେଷାଚ୍ଛେଷସ୍ତେ ଗୁଣଗଣମଶେଷଂ ନିଗଦିତୁଂ
ପ୍ରଭୁର୍ୱକ୍ତୁଂ ଦୋଷାନ୍ ସଦସି ବହୁରୋଷାନ୍ମୁହୁରହମ୍ ।
ବ୍ରୁବେ ମଜ୍ଜଜ୍ଜନ୍ତୋର୍ଜନନି ! ଜୟତି ବ୍ୟାଲପଟଲୀ
ବିଶାଲୀ କଣ୍ଠେ ଚ ସ୍ଥିତିରପି ସଦା ଭୂତଭୁବନେ ॥ ୭॥

ସମାୟାତା କସ୍ମାତ୍କ୍କ ଚ ଜଗତି ଯାତୀୟମଧୁନା
କଥଙ୍କାରଂ ପାରଂ ତବ ଜନନି ! ଜାନନ୍ତି ବିବୁଧାଃ ।
ନ ତେଷାଂ ହାନିଃ ସ୍ୟାତ୍ସୁରନଦି ! ତବାପାରବିଦୁଷାଂ
ଜନା ମୂଢାଃ କିଂ ଯେ ଭୁବି ଶଶବିଷାଣଂ ନ ହି ବିଦୁଃ ॥ ୮॥

ତ୍ୱଦନ୍ୟେ ମନ୍ୟେଽହଂ ଦଧତି ବିବୁଧାଃ ସିଦ୍ଧିନିଚୟଂ
ପ୍ରସନ୍ନା ଭକ୍ତେଭ୍ୟୋ ନିଜଜପରତେଭ୍ୟୋଽପି ନିଖିଲାଃ ।
ପିବନ୍ତଂ ପାନୀୟଂ ତପନକରତପ୍ତଂ ତନୁଭୃତଂ
ବିଧତ୍ସେ ସିଦ୍ଧୀଶଂ ସୁରନଦି ! ଗିରୀଶଂ ଚ କୃପୟା ॥ ୯॥

ପୂର୍ଣେନ୍ଦୋର୍ଦତ୍ତଭଙ୍ଗାଃସୁରପୁରଲଲନୋଦ୍ୱର୍ତ୍ତନୈଶ୍ଚାପି ପିଙ୍ଗାଃ
ଶମ୍ଭୁଂ ଗନ୍ତୁଂ ତୁରଙ୍ଗା ହରିପଦଗମନେ ବୈନତେୟୋ ବିହଙ୍ଗାଃ ।
ବିତ୍ତାଶାଦତ୍ତଚିତ୍ତାନୁଦରଭୃତିପରାନ୍ତୀରଗାନ୍ଭୁକ୍ତଭୋଗାନ୍
ଭୁକ୍ତେଶାନପ୍ରସଙ୍ଗାଜ୍ଜଗତି କଲିୟୁଗାତ୍ପାନ୍ତୁ ଗଙ୍ଗାତରଙ୍ଗାଃ ॥ ୧୦॥

ଇତି ଶ୍ରୀମଦ୍ଗୁରୁଣା ବିରଚିତଃ ଗଙ୍ଗାପୁଷ୍ପାଞ୍ଜଲିଃ ସମ୍ପୂର୍ଣଃ ।