ଗଙ୍ଗାକବଚମ୍ ଦିବ୍ୟମଙ୍ଗଲାଖ୍ୟମ୍

 ଗଙ୍ଗାକବଚମ୍ ଦିବ୍ୟମଙ୍ଗଲାଖ୍ୟମ୍

॥ ଶ୍ରୀଗଣେଶାୟ ନମଃ ॥

ଋଷୟ ଊଚୁଃ --
ଭଗବନ୍! ସର୍ୱଧର୍ମଜ୍ଞ! ସର୍ୱଶାସ୍ତ୍ରବିଶାରଦ! ।
ଶ୍ରୀଗଙ୍ଗାୟାସ୍ତୁ କବଚଂ ବ୍ରୂହି ନୋ ବଦତାଂ ବର! ॥ ୧॥

ଗୁପ୍ତଂ ସହସ୍ରନାମାଖ୍ୟଂ ସ୍ତୋତ୍ରଂ ପରମପାବନମ୍ ।
ଇଦାନୀଂ ଶ୍ରୋତୁମିଚ୍ଛାମି ଗଙ୍ଗାୟାଃ କବଚଂ ଶୁଭମ୍ ॥ ୨॥

ଯସ୍ୟ ଶ୍ରବଣମାତ୍ରେଣ ଗଙ୍ଗାଦେବୀ ପ୍ରସୀଦତି ।
ପାପାନି ଚ ବିଲୀୟନ୍ତେ ବର୍ଧନ୍ତେ ଧନସମ୍ପଦଃ ॥ ୩॥

ସନତ୍କୁମାର ଉବାଚ --
ଶୃଣୁଧ୍ୱଂ ମୁନୟଃ ସର୍ୱେ ଗୁହ୍ୟାଦ୍ଗୁହ୍ୟତରଂ ପରମ୍ ।
ଜାହ୍ନବ୍ୟା ଦିବ୍ୟକବଚଂ ଭୁକ୍ତିମୁକ୍ତିଫଲପ୍ରଦମ୍ ॥ ୪॥

ଓଁ ଅସ୍ୟ ଶ୍ରୀଗଙ୍ଗାକବଚମନ୍ତ୍ରସ୍ୟ ଶ୍ରୀସଦାଶିବ ଋଷିରନୁଷ୍ଟୁପ୍ ଛନ୍ଦଃ
ସଂସାରତାରିଣୀ ଶ୍ରୀଗଙ୍ଗା ଦେବତା ଶ୍ରୀ ବୀଜଂ ଗଂ ଶକ୍ତିଃ ଗାମିତି କୀଲକଂ
ମମ ସକଲପାପକ୍ଷୟପୂର୍ୱକଂ ମୋକ୍ଷସାଧନେ ଜପେ ବିନୟୋଗଃ ॥

ଅଥ ଧ୍ୟାନଂ ପ୍ରବକ୍ଷ୍ୟାମି ଗଙ୍ଗାୟାଃ ସୁରଦୁର୍ଲଭମ୍ ।
ଯତ୍ କୃତ୍ୱା ମୁନୟଃ ସମ୍ୟକ୍ ପରାଂ ସିଦ୍ଧିମିତୋ ଗତାଃ ॥ ୬॥

ନେତ୍ରତ୍ରୟୋଦ୍ଭାସିତଚାରୁଦେହାଂ ଶ୍ୱେତାମ୍ବରାଂ ଚନ୍ଦ୍ରକଲାତ୍ମିକାଂ ଚ ।
ମାଣିକ୍ୟମୁକ୍ତାଫଲଭୂଷିତାଙ୍ଗୀ ଶ୍ୱେତାତପତ୍ରାଂ କରୁଣାରସାର୍ଦ୍ରାମ୍ ॥ ୭॥

ସୂର୍ୟେନ୍ଦୁକୋଟିଦ୍ୟୁତିମଙ୍ଗନାଭିଃ ସଚାମରାଭିଃ ପରିବୀଜ୍ୟମାନାମ୍ ।
ଚତୁର୍ଭୁଜାଂ ହସ୍ତଚତୁଷ୍ଟୟେନ ବରାଭୟେ ପଦ୍ମୟୁଗଂ ଦଧାନାମ୍ ॥ ୮॥

ଦିବ୍ୟାନୁଲେପେନ ବିଭୂଷିତାଙ୍ଗୀ ଦିବ୍ୟାଂ ଦଧାନାଂ ସ୍ରଜମାଦିଶକ୍ତିମ୍ ।
ସୁରୈରନେକୈରୃଷିଭିଶ୍ଚ ଦିବ୍ୟୈର୍ନିଷେବ୍ୟମାନାମୁପଚାରୟୋଗୈଃ ॥ ୯॥

ନାନାବିଧାନ୍ପାତକିନଃ ପ୍ରପତ୍ରାନ୍ ସନ୍ତାରୟନ୍ତୀ କରୁଣାଦୃଶାର୍ଦ୍ରାମ୍ ।
ଧ୍ୟାୟେଦିମାଂ ପୂର୍ଣଶଶାଂଙ୍କଶୁଭ୍ରାଂ ନଦୈର୍ନଦୀଭିଃ ପରିସେବ୍ୟମାନାମ୍ ॥ ୧୦॥

ଏବଂ ଧ୍ୟାତ୍ୱା ମହାଦେବୀ ଗଙ୍ଗାଂ ତ୍ରିଭୁବନେଶ୍ୱରୀମ୍ ।
ଜପେନ୍ମନ୍ତ୍ରଂ ମହାଦେବ୍ୟାସ୍ତସ୍ୟୋଦ୍ଧାରୋ ନିରୂପ୍ୟତେ ॥ ୧୧॥

ପ୍ରଣବୋ ବାଗ୍ଭବଂ ମାୟା କାମବୀଜଂ ନମଃ ପଦମ୍ ।
ଭଗବତ୍ୟମ୍ବିକେ ଅମ୍ବାଲିକେ ପଦମଥୋଦ୍ଧରେତ୍ ॥ ୧୨॥

ମହାମାଲିନି ତସ୍ୟାନ୍ତ ଏହ୍ୟୋହି ପଦମୁଦ୍ଧରେତ୍ ।
ଅଶେଷତୀର୍ଥାଲବାଲେ ମାୟାଲକ୍ଷ୍ମୀର୍ମନୋଭବଃ ॥ ୧୩॥

ତତଃ ଶିବଜଟାଜୂଟାଧିରୂଢେ ପଦମୁଦ୍ଧରେତ୍ ।
ଗଙ୍ଗେ ଗଙ୍ଗାମ୍ବିକେ ସ୍ୱାହା ମନୁର୍ଦ୍ୱିକରଣାକ୍ଷରଃ ॥ ୧୪॥

ସର୍ୱସମ୍ପତ୍ପ୍ରଦଃ ସର୍ୱପାତକୌଘବିନାଶନଃ ।
ସର୍ୱକଲ୍ୟାଣନିଲୟୋ ଗଙ୍ଗାସାନ୍ନିଧ୍ୟକାରକଃ ॥ ୧୫॥

ଏତସ୍ୟ ମନ୍ତ୍ରରାଜସ୍ୟ ମହାଦେବ ଋଷିଃ ସ୍ୱୟମ୍ ।
ବିରାଟ୍ ଛନ୍ଦଃ ସ୍ମୃତଂ ଦେବୀ ଜାହ୍ନବୀ ଦେବତା ସ୍ୱୟମ୍ ॥ ୧୬॥

ତାରୋ ବୀଜଂ ବାଗ୍ଭବଂ ଚ ଶକ୍ତିର୍ମାୟା ଚ କୀଲକମ୍ ।
ତାରକଂ କାମବୀଜଂ ଚ ମୁକ୍ତୌ ଚ ବିନିୟୋଗକଃ ॥ ୧୭॥

କୁର୍ୟାତ୍ ଷଡଂଙ୍ଗ ମନ୍ତ୍ରଂ ସ୍ୱମାୟଯା ପ୍ରଣବାଦ୍ୟଯା ।
ଷଡ୍ଦୀର୍ଘଭିନୟାତ୍ପଶ୍ଚାଜ୍ଜପେନ୍ମନ୍ନ୍ତ୍ରଂ ଶତାଷ୍ଟକମ୍ ॥ ୧୮॥

ତତସ୍ତୁ କବଚଂ ଦେବ୍ୟାଃ ପଠେତ୍ ସର୍ୱାର୍ଥସିଦ୍ଧୟେ ।
ତଦହଂ ସମ୍ପ୍ରବକ୍ଷ୍ୟାମି ଶୃଣୁଧ୍ୱଂ ମୁନିପୁଙ୍ଗବାଃ ॥ ୧୯॥

ପ୍ରାଚ୍ୟାଂ ଶ୍ରୀଜାହ୍ନବୀ ପାତୁ ଯାମ୍ୟାଂ ଗଙ୍ଗା ସଦାଽବତୁ ।
ଭୀଷ୍ମସୂଃ ପଶ୍ଚିମାୟାଂ ମେ ଉଦୀଚ୍ୟାଂ ସୁରନିମ୍ନଗା ॥ ୨୦॥

ଭାଗୀରଥ୍ୟଗ୍ନିକୋଣେ ମାଂ ତ୍ରିସ୍ରୋତାଃ ପାତୁ ନୈରୃତେ ।
ବାୟବ୍ୟେ ମାଂ ଶ୍ୱେତବାସା ଈଶାନେ ତ୍ରିପଥସ୍ଥିତା ॥ ୨୧॥

ବ୍ରହ୍ମଗଙ୍ଗା ଚୋର୍ଧ୍ଦ୍ୱଦେଶମଧଃ ପାତାଲଜାହ୍ନବୀ ।
ଦିଗ୍ୱିଦିକ୍ପ୍ରାନ୍ତରାଲେ ମାଂ ଗଙ୍ଗା ସ୍ୱର୍ଗଗତାଽବତୁ ॥ ୨୨॥

ହୃଦସ୍ତେ ପାତୁ ମେ କେଶାନଭୟଂ ମେ ଶିରୋଽବତୁ ।
ଭାଲଂ ମେ କମଲଂ ପାତୁ ଧ୍ରୁବୌ ଚନ୍ଦ୍ରକଲାଽବତୁ ॥

ନେତ୍ରେ ପାତୁ ଜଗଦ୍ଧାତ୍ରୀ ମମୋଷ୍ଠଂ ବିଜୟାଽବତୁ ।
ବିଷ୍ଣୁଃ ପଦ୍ମଧରଂ ପାତୁ ଶ୍ରୋତ୍ରେ ପାତୁ ସୁଦର୍ଶନା ॥ ୨୩॥

ମନ୍ଦାକିନୀ ଦନ୍ତପଙ୍କ୍ତିଂ ସ୍ୱର୍ଗଗାଗଣ୍ଡୟୁଗ୍ମକମ୍ ।
ସୁଧାଜଲା ପାତୁ ଜିହ୍ୱାଂ ବାଣୀ ପାତୁ ମୁଖଂ ମମ ॥ ୨୪॥

ତୋତଲା ତାଲୁଦେଶଂ ମେ ଚିବୁକଂ ସର୍ୱମଙ୍ଗଲା ।
ମନ୍ଦାକିନୀ ବକ୍ତ୍ରବୃତ୍ତଂ ବ୍ୟୋମ-ଗଙ୍ଗାଜଲଂ ମମ ॥ ୨୫॥

କୃକୋଟିକାଂ କଲ୍ମଷଘ୍ନୀ ସ୍କନ୍ଧୟୋଃ ସୁରନିମ୍ନଗା ।
କୌର୍ମୀ ପାତୁ ଭୁଜଦ୍ୱନ୍ଦ୍ୱଂ ପାଣ୍ୟୋଃ ଫଲକମୀଶ୍ୱରୀ ॥ ୨୬॥

କରାଙ୍ଗୁଲୀଃ ପାତୁ ଚାନ୍ଦ୍ରୀ ନଖାନାକାଶଚନ୍ଦ୍ରିକା ।
ସୂର୍ୟମଣ୍ଡଲଗା ପାତୁ କକ୍ଷାଂ ସାଗରତାରିଣୀ ॥ ୨୭॥

ବକ୍ଷଃସ୍ଥଲଂ ପାତୁ ନିତ୍ୟଂ ଦେବୀ ମେଽଲକନନ୍ଦିକା ।
ହୃଦୟଂ ପାତୁ ଚକ୍ଷୁମେଂ ସୀତା ପାତୂଦରଂ ମମ ॥ ୨୮॥

ପାର୍ଶ୍ୱୟୋଃ ପର୍ୱତଦ୍ରାବା ସ୍ତନୌ ସୋମେଶ୍ୱରୀ ତଥା ।
ଜଗଦୁଦ୍ଧାରିଣୀ ନାଭିଂ ପୃଷ୍ଟଂ ମକରବାହନା ॥ ୨୯॥

ବିଷ୍ଣୁଶକ୍ତିଃ କଟିଂ ପାତୁ ସ୍ଫିଚୌ ପାତୁ ଦୟାମ୍ବୁଧିଃ ।
ବିଷ୍ଣୁ ପାଦାବ୍ଜସମ୍ଭୂତା ଗୁହ୍ୟଂ ମେ ପରିରକ୍ଷତୁ ॥ ୩୦॥

କୃପାକୋମଲଗାତ୍ରୀ ସା ମୂଲାଧାରଂ ମମାବତୁ ।
ସ୍ୱାଧିଷ୍ଠାନଂ ପାତୁ ନିତ୍ୟଂ ପାପାଦଥ ଦବାନଲା ॥ ୩୧॥

ପାୟାନ୍ମେ ମଣିପୂରଂ ସା ଶାନ୍ତନୋଃ ସୁଖବର୍ଧିନୀ ।
ଅନାହତଂ ସଦା ପାୟାଦ୍ ଭଗୀରଥନିଷେବିତା ॥ ୩୨॥

ବିଶୁଦ୍ଧଚକ୍ରଂ ମେ ପାତୁ ବଶିଷ୍ଠୋପାସିତାମ୍ବିକା ।
ଆଜ୍ଞାଚକ୍ରଂ ମମ ପ୍ରୀତ୍ୟା ବିଶ୍ୱାମିତ୍ରାର୍ଚିତାଽବତୁ ॥ ୩୩॥

ବ୍ରହ୍ମରନ୍ଧ୍ରଂ ସଦା ପାତୁ ସ୍ରବତ୍ପୀୟୂଷମନ୍ଦିରମ୍ ।
ସ୍ୱୟମ୍ଭୂଲିଙ୍ଗିନୀ ଲିଙ୍ଗଂ କୁଣ୍ଡଲୀ ପରଦେବତା ॥ ୩୪॥

ପତିତୋଦ୍ଧାରିଣୀ ପାତୁ ଜଠରଂ ଶଙ୍କରପ୍ରିୟା ।
ଜଟାଲଙ୍କାରିଣୀ ଶମ୍ଭୋରୁରୂୟୁଗ୍ମଂ ମମାବତୁ ॥ ୩୫॥

ଜାନୂ ମୃଡାନୀ ମେ ପାତୁ ଜଙ୍ଘେ ପାତୁ ଜଗତ୍ପ୍ରସୂଃ ।
ଲାବଣ୍ୟଶେବଧିଃ ପାତୁ ଗୁଲ୍ଫୋ ଗଗନମେଖଲା ॥ ୩୬॥

ମତ୍ସ୍ୟକକ୍ଷପହଂସାଲିରାଜିତା ପାତୁ ପାଦୟୋଃ ।
ପାଦାଂଙ୍ଗୁଲୀଃ ପାତୁ ନିତ୍ୟଂ ନିଶ୍ରେଣୀ ସମନୋହରେ ॥ ୩୭॥

ରସାସୃଙ୍ମାଂସମେଦାଂସି ପାତୁ ମେ ଭବତାରିଣୀ ।
ମନୋବୁଦ୍ଧିମହନ୍ତାଂ ମେ ପାତୁ ନାରାୟଣୀ ସଦା ॥ ୩୮॥

ଆୟୁଃ କଲ୍ୟାଣଦା ପାତୁ ବୟୋ ରକ୍ଷତୁ ବୈଷ୍ଣବୀ ।
ଭାର୍ୟାଂ ବୃଦ୍ଧିକରୀ ପାତୁ ପୁତ୍ରାନ୍ ବଂଶକରୀ ମମ ॥ ୩୯॥

ଗୃହଂ ରକ୍ଷତୁ ଲକ୍ଷ୍ମୀ ମେଂ ପାତୁ କ୍ଷେତ୍ରଂ ଶିବପ୍ରିୟା ।
ଧର୍ମକର୍ତ୍ରୀ ଯଶଃ ପାତୁ ଧର୍ମଂ ପାତୁ ମନଃସ୍ୱିନୀ ॥ ୪୦॥

କୁଲଂ କୁଲେଶୀ ମେ ପାତୁ ସଦ୍ଗତିଂ ପାତୁ ସଦ୍ଗତିଃ ।
ଜଲେ ସ୍ଥଲେଽନଲେଽରଣ୍ୟେ ପାତାଲେ ରଣସଙ୍କଟେ ॥ ୪୧॥

ଦୁର୍ଗେ ଗୃହେ ଜଗନ୍ନାଥା ପାତୁ ସର୍ୱନଦୀଶ୍ୱରୀ ।
ଅଗ୍ରତଃ ପାତୁ ଗଙ୍ଗୋର୍ଧ୍ୱଂ ପାତୁ ଗଙ୍ଗା ଚ ପାର୍ଶ୍ୱୟୋଃ ॥ ୪୨॥

ଗଙ୍ଗୈବ ପୃଷ୍ଠତଃ ପାତୁ ତଥାଧଃ ପାତୁ ମେ ବପୁଃ ।
ଇତୀଦଂ କବଚଂ ଦିବ୍ୟଂ ଗଙ୍ଗାୟାଃ ପରମାଦ୍ଭୁତମ୍ ॥ ୪୩॥

ଋଷୟଃ କଥିତଂ ସାକ୍ଷାନ୍ମହାପାତକନାଶନମ୍ ।
ଏକକାଲଂ ଦ୍ୱିକାଲଂ ବା ତ୍ରିକାଲଂ ଯଃ ସଦା ପଠେତ୍ ॥ ୪୪॥

ଗଙ୍ଗାୟାଃ ଶ୍ରାବୟେଦ୍ୱାପି ତସ୍ୟ ପାପଂ ପ୍ରଣଶ୍ୟତି ।
ବର୍ଧନ୍ତେ ସମ୍ପଦଃ ସର୍ୱାଃ ସମ୍ପଦ୍ୟନ୍ତେ ମନୋରଥାଃ ॥ ୪୫॥

ଜାୟତେ ସିଦ୍ଧୟୋଽଷ୍ଟୌ ଚ ନଶ୍ୟନ୍ତି ବିପଦଃ କ୍ଷଣାତ୍ ।
କୁଷ୍ଠାତ୍ ପ୍ରମୁଚ୍ୟତେ କୁଷ୍ଠୀ ବ୍ୟାଧିଭ୍ୟଶ୍ଚାପି ମୁଚ୍ୟତେ ॥ ୪୬॥

ନିର୍ମଲଂ ସ୍ୟାନ୍ମନସ୍ତସ୍ୟ ବିଶୁଦ୍ଧଂ ସ୍ଫଟିକୋପମମ୍ ।
ଯସ୍ୟ ଯସ୍ୟ ଚ ଦେବସ୍ୟ କ୍ରିୟତେ ପୂଜନଂ ଜପଃ ॥ ୪୭॥

ତସ୍ୟ ତସ୍ୟ ପ୍ରସାଦଂ ସା ଗଙ୍ଗାଦେବୀ ପ୍ରୟଚ୍ଛତି ।
ପାତକାନାମନେକାନାଂ ପ୍ରାୟଶ୍ଚିତ୍ତଂ ଚିକୀର୍ଷୁଣା ॥ ୪୮॥

ପଠନୀୟଂ ତୁ ଗଙ୍ଗାୟାଃ କବଚଂ ପାତକାପହମ୍ ।
ଗଙ୍ଗାମାହାତ୍ମ୍ୟବିଣ୍ମନ୍ତ୍ରୀ ଗଙ୍ଗା-କବଚମଭ୍ୟସେତ୍ ॥ ୪୯॥

ସ ସ୍ନାତଃ ସର୍ୱତୀର୍ଥେଷୁ ସର୍ୱୟଜ୍ଞେଷୁ ଦୀକ୍ଷିତଃ ।
ସର୍ୱାଣି ତେନ ଦାନାନି ଦତ୍ତାନି ମୁନିପୁଙ୍ଗବାଃ ॥ ୫୦॥

ଶ୍ରୀବିଷ୍ଣୁସ୍ତୋଷିତସ୍ତେନ ତୋଷିତସ୍ତେନ ଶଙ୍କରଃ ।
ଅର୍ଘ୍ୟଦାନେନ ସନ୍ତୁଷ୍ଟଃ କୃତସ୍ତେନ ଦିବାକରଃ ॥ ୫୨॥

ତସ୍ୟ ପାପାନି ନଶ୍ୟନ୍ତି ମହାନ୍ତ୍ୟପି ନ ସଂଶୟଃ ।
ନାଭିମାତ୍ରେ ଜଲେ ସ୍ଥିତ୍ୱା ଯୋ ଗଙ୍ଗାକବଚଂ ପଠେତ୍ ॥ ୫୩॥

ସ ସ୍ୱପ୍ନେ ପଶ୍ୟତି କ୍ଷିପ୍ରଂ ଜାହ୍ନବୀ ପୁରତଃ ସ୍ଥିତାମ୍ ।
ଇଦଂ କବଚମଜ୍ଞାତ୍ୱା ଗଙ୍ଗାମନ୍ତ୍ରଂ ଜପେନ୍ନରଃ ॥ ୫୪॥

ସର୍ୱବିଘ୍ନୈଃ ସ ବାଧ୍ୟଃ ସ୍ୟାଦ୍ୱ୍ୟାଘ୍ରୈର୍ମୃଗଂଶିଶୁର୍ୟଥା ।
ଗଙ୍ଗା ଗଙ୍ଗେତି ଯୋ ବ୍ରୂୟାଦ୍ ଯୋଜନାନାଂ ଶତୈରପି ।
ମୁଚ୍ୟତେ ସର୍ୱପାପେଭ୍ୟୋ ହରିସାୟୁଜ୍ୟମାପ୍ନୁୟାତ୍ ॥ ୫୫॥

ଇଦଂ ଗଙ୍ଗାଜଲେ ସ୍ଥିତ୍ୱା କବଚଂ ଯଃ ସକୃଜ୍ଜପେତ୍ ।
ଭୂତପ୍ରେତପିଶାଚାଦିବାଧାଭ୍ୟୋ ମୁଚ୍ୟତେ କ୍ଷଣାତ୍ ॥ ୫୬॥

ପିତରସ୍ତୃପ୍ତିମାୟାନ୍ତି କବଚସ୍ୟାସ୍ୟ ପାଠତଃ ।
ଶ୍ରାଦ୍ଧକାଲେ ପଠେନ୍ମର୍ତ୍ୟୋ ନୟେତ୍ସ୍ୱର୍ଗଂ ପିତାମହାନ୍ ॥ ୫୭॥

ଭୂର୍ଜେ ଲିଖିତ୍ୱା କବଚଂ ମସ୍ତକେ ଧାରୟେଦ୍ୟଦି ।
ଯତ୍ର ତତ୍ର ବିପନ୍ନୋଽପି ବାରାଣସ୍ୟାଂ ମୃତୋ ଭବେତ୍ ॥ ୫୮॥

ମୁନିଭିଃ କଥିତଂ ଦେବ୍ୟାଃ ଜାହ୍ନବ୍ୟାଃ କବଚୋତ୍ତମମ୍ ।
ଯୂୟଂ ପଠଧ୍ୱଂ ସତତଂ ସଦ୍ଗତିଂ ସମବାପ୍ସ୍ୟଥ ॥ ୫୯॥

॥ ଇତି ଶ୍ରୀବ୍ରହ୍ମାଣ୍ଡପୁରାଣେ ଋଷିସନତ୍କୁମାରସଂବାଦେ
ଗଙ୍ଗାୟା ଦିବ୍ୟମଙ୍ଗଲଂ ନାମ କବଚଂ ସମ୍ପୂର୍ଣମ୍ ॥

ଶୁଭମସ୍ତୁ ।

ଶୁଭମସ୍ତୁ ସର୍ୱଜଗତଃ ।

॥ ଶ୍ରୀଗଙ୍ଗାୟୈ ନମଃ ॥