ଗଙ୍ଗାତରଙ୍ଗଃ

 ଗଙ୍ଗାତରଙ୍ଗଃ

॥ ଶ୍ରୀଗଣେଶାୟ ନମଃ ॥

ଶ୍ରୀଗଙ୍ଗେ ଭାଗୀରଥି ଶ୍ରୀଶଙ୍କରମୌଲିମାଲତୀମାଲେ ।
କରୁଣାବତି ଜୟ ଭଗବତି ପାହି କୃପାପାଙ୍ଗତଃ ଶିବସଦୟେ ॥ ୧॥

ପଙ୍କ୍ତାବୁପବିଷ୍ଟାନାଂ ସର୍ୱେଷାଂ ତର୍ପଣଂ ସମଂ ନ୍ୟାୟ୍ୟମ୍ ।
ମମ ତୁ ଶ୍ରୋତ୍ରଂ ତୃପ୍ତଂ ଗଙ୍ଗେ ! ରୀତିଃ କଥଂ ତ୍ୱଦୀୟେୟମ୍ ॥ ୨॥

ସର୍ୱେନ୍ଦ୍ରିୟସୌହିତ୍ୟଂ ଯଥା ଭବିଷ୍ୟତି ତଥା ଲଘୁ ବିଧେୟମ୍ ।
ଅଦ୍ୟାବଧି ଯଜ୍ଜାତଂ ଜାତଂ ଗଙ୍ଗେ ! ତ୍ୱୟା ଦୟା କାର୍ୟା ॥ ୩॥

ଦୟନୀୟୋଽୟଂ ଗଙ୍ଗେ ସର୍ୱୈଧର୍ମାଦିଭିଃ ପରିତ୍ୟକ୍ତଃ ।
ଯାମି ଶରଣଂ କମଧୁନା ତ୍ୱୟା ବିନା ବ୍ରାତ୍ୟରାଜୋଽହମ୍ ॥ ୪॥

ପୂର୍ୱଂ ସମୁଦ୍ଧୃତଃ କତି ସମ୍ପ୍ରତ୍ୟୁଦ୍ଧର୍ତୁମନଲସାସି ତ୍ୱମ୍ ।
ଅଗ୍ରେ ସମୁଦ୍ଧରିଷ୍ୟସି ତନ୍ମଧ୍ୟେ ମାଦୃଶୋ ନୈବ ॥ ୫॥

ପୂର୍ୱଂ ନ ଚୈବ ମାଦୃଙ୍ ନୋଚେଦାନୀଂ ପୁରଃ କୁତୋ ଭବିତା ।
ଇତି ସଙ୍ଖ୍ୟାତୁମନଲସା ଭବ ଭବତି ଜାହ୍ନବି ତ୍ରିପଥଗେ ତ୍ୱମ୍ ॥ ୬॥

ପାପିନ ଉଦ୍ଧର୍ତୁ ତ୍ୱଂ ବଦ୍ଧପରିକରା ଶ୍ରୁତଂ ମନୀଷିଭ୍ୟଃ ।
ଇତ୍ଥଂ ସତି ମଦ୍ୱିଷୟେ ଗଙ୍ଗେ କେୟଂ ପ୍ରମୀଲା ତ୍ୱମ୍ ॥ ୭॥

ପ୍ରାକ୍କର୍ମ ପଚେଲିମତାମାପ୍ତମିଦାନୀନ୍ତନେ ଜନୁଷି ।
ଇତି ବିଦିତମହୋ ଗଙ୍ଗେ ପ୍ରୋତ୍କା ଯତ୍ସେବନାୟ ଧିଷଣେୟମ୍ ॥ ୮॥

ତବ ଭବତୁ ନମସ୍କାରୋ ମଦ୍ୱିଷୟେ ଦେବି ! ଭୋ ନମସ୍ତୁଭ୍ୟମ୍ ।
କରୁଣାବତି ଜୟ ଗଙ୍ଗେ ପାହି କୃପାପାଙ୍ଗଦୃଷ୍ଟିପାତୈଃ ॥ ୯॥

କତିଚିଦ୍ ବ୍ରୁବନ୍ତି ବିନ୍ଦୁଂ ନିତମ୍ବମାତ୍ରଂ ଚ ଜାନୁଦଘ୍ନଂ ଚ ।
କେଚିଦ୍ ଗୁଲ୍ଫଦ୍ୱୟସମ୍ଭବସିନ୍ଧୁଂ ଦେବତାନ୍ତରାଶ୍ରୟଣାତ୍ ॥ ୧୦॥

ତବ ସଂଶ୍ରୟାଦ୍ଧି ଗଙ୍ଗେ ଭବସିନ୍ଧୋରସ୍ତିତାଂ ନ ମନ୍ୟେଽହମ୍ ।
ଅଥବା ମନ୍ୟେ ଭ୍ରମଂ ଖେନଗରଃ ଶଶବିଷାଣମଂଶୁଜଲମ୍ ॥ ୧୧॥

ଶରଦାଂ ପଞ୍ଚସହସ୍ରୀ ତବସ୍ଥିତେର୍ମାନମିତି ବିଦାମାଜ୍ଞା ।
ଗଙ୍ଗେ ଯଦବଧି ବିଦିତା ତଦବଧି ମାଂ ପୀଡ୍ୟତ୍ୟଧୀରତ୍ୱମ୍ ॥ ୧୨॥

ଯସ୍ମିନ୍କସ୍ମିନ୍ ହି ଭବେ ତିର୍ୟଶ୍ଚିତ୍ୱଂ ସମୁଦ୍ଧରିଷ୍ୟସି ମାମ୍ ।
ଇତି ସତ୍ୟମଥାପ୍ୟସ୍ମିଁଶ୍ଚରମଭବେ ପାସି ଚେଚ୍ଚମତ୍କାରଃ ॥ ୧୩॥

ବୀଚୀପତିତଂ ସର୍ୱା ନଦ୍ୟଃ ସନ୍ତାରୟନ୍ତି କିଂ ଚିତ୍ରମ୍ ।
ତ୍ୱମବୀଚୀପତିତମପି ହି ଗଙ୍ଗେ ସନ୍ତାରୟସ୍ୟହୋ ଚିତ୍ରମ୍ ॥ ୧୪॥

ବଂଶାନୁତ୍ପାଦୟସି ତ୍ୱଂ ବର୍ଦ୍ଧୟସେ ତଥୈବ ଜୀବୟସି ।
ରକ୍ଷସି ବିସ୍ତାରୟସି ସ୍ୱସ୍ମିନ୍ପତିତଂ ହି ତାରୟସି ॥ ୧୫॥

ସଦ୍ୱଂଶଭବେ ବଂଶୋଦ୍ଧାରିଣି ଗଙ୍ଗେ ନମସ୍କରୋମି ତ୍ୱାମ୍ ।
ବଂଶ୍ୟମପି ଦୀନଂ ଦ୍ୱିଜଂ କିଂ ତ୍ୱଂ ନାଦ୍ୟାପି ତାରୟସି ॥ ୧୬॥

ନୋ ତାରୟସି ହି ମାଂ ଚେନ୍ମା ତାରୟ ଦେବି ଭୋଃ ସ୍ୱତନ୍ତ୍ରା ତ୍ୱମ୍ ।
ମଜ୍ଜୟସି ତର୍ହି ମଜ୍ଜୟ ଗଙ୍ଗେ ସ୍ୱସ୍ମିନ୍ସୁଗଣ୍ଡଶୈଲମିବ ॥ ୧୭॥

ମା ମାସ୍ତୁ ମଦୁଦ୍ଧାରୋ ନୈବ ତ୍ୱାମର୍ଥୟେ କଦାଚିଦପି ।
କ୍ଷୁଦ୍ରଂ ଯାଦୋଜାତଂ ବିଧାୟ ମାଂ ସ୍ଥାପୟାଶୁ ନିଜଜଠରେ ॥ ୧୮॥

ଯଦ୍ୟପି ଯାଦଃ କ୍ଷୁଦ୍ରଂ ଚରତି ମହଚ୍ଚେତ୍ତଥାପି ମଦନୁମତିଃ ।
କିଂ ତବ ଗତମତ୍ର ପରଂ ମଜ୍ଜୟ ନାମାଶୁ ମା ବିଧେହି ଚିରମ୍ ॥ ୧୯॥

ଭବସିନ୍ଧୌ ମଜ୍ଜାୟା ବିଭ୍ୟତି ତାଭ୍ୟଃ ସୁବିଦ୍ୱାଂସଃ ।
ନାହଂ ବିଭେମି ମାତର୍ଭବସିନ୍ଧୌ ତ୍ୱୟି ମମାସ୍ତୁ ମଜ୍ଜୈବଃ ॥ ୨୦॥

ଲକ୍ଷ୍ମୀନାଥଂ ତ୍ୟକ୍ତ୍ୱା ମତ୍ୱା ଶ୍ଲାଘ୍ୟଂ କପର୍ଦିସମ୍ବନ୍ଧମ୍ ।
ଗଙ୍ଗେ ଭୂମୌ ବିଚରସ୍ୟତଃ କପର୍ଦ୍ୟସ୍ମି ଦୃଗ୍ୱିଷୟଃ ॥ ୨୧॥

ଗୋମୂର୍ତ୍ୟଶ୍ୱତ୍ଥାଦୀନିତରତ୍ର ତ୍ୱଂ କୁରୁଷ୍ୱ ମା ମାମ୍ଭୋଃ ।
କୃମିମଶକବେତସାଦୀନ୍ ପ୍ରବିଧାୟ ସ୍ଥାପୟାଶୁ ନିଜଜଠରେ ॥ ୨୨॥

ସଗରାନୁଦ୍ଧର୍ତୁମନା ଭୂରନ୍ଧ୍ରପ୍ଲାବନଂ କୃତବତୀ ତ୍ୱମ୍ ।
ସଗରୋଽସ୍ମି ବହୁଲରନ୍ଧ୍ରଃ ପ୍ଲାବୟସି ନ ମାଂ ସୁରାପଗେ କିମିତି ॥ ୨୩॥

ସୁରସଙ୍ଗାତ୍ସୁରଧୁନିତା ପ୍ରାପ୍ତା ଯାତା ତଥାପି ନୋକ୍ଷରତା ।
ଭୂସୁରସଙ୍ଗାଦଧିକୈକାକ୍ଷରତାପ୍ତିଃ କଥଂ ନ ସା ବ୍ରିୟତେ ॥ ୨୪॥

ତ୍ୱନ୍ମଜ୍ଜନମେବ ପରଂ ଶ୍ଲାଘ୍ୟଂ ମାନ୍ୟଂ ଶ୍ରୁତେର୍ୱଚୋଽସ୍ମାକମ୍ ।
ନାନ୍ୟତ୍ରାମରମୁକ୍ତାବଲିନୀରାଜିତପଦଂ ପଦଂ ଶାକ୍ରମ୍ ॥ ୨୫॥

ଅଚ୍ୟୁତପଦଚ୍ୟୁତାପି ହି ଦାତୁଂ ନୈନଂ ପଦଂ ସ୍ୱତନ୍ତ୍ରା ତ୍ୱମ୍ ।
କାଽନ୍ୟେଦୃଶୀ ଦ୍ୱିତୀୟା ସ୍ୱପଦଭ୍ରଷ୍ଟା ସତୀ ତଦର୍ପୟିତୁମ୍ ॥ ୨୬॥

ଦୋଷତ୍ରୟାପନୁତ୍ୟୈ ତ୍ରିବିଧା ମର୍ତ୍ୟାସ୍ତ୍ୱୟି ପ୍ରମଜ୍ଜନ୍ତି ।
ଦ୍ୱିଚତୁର୍ଦଶଦୋଷାଢ୍ୟାଂସ୍ତାଂସ୍ତ୍ୱଂ କୁରୁଷେ କଥଂ ତ୍ୱେତତ୍ ॥ ୨୭॥

କଶ୍ଚିତ୍କଞ୍ଚିଚ୍ଛ୍ରୟତେତ୍ୟାଧିକ୍ୟଂ ଲବ୍ଧୁମିତି ଜନସ୍ଥିତ୍ୟାମ୍ ।
ଭୂତଂ ଚତୁର୍ୱିଧଂ ତ୍ୱଂ ତ୍ରିବିଧଂ କୁରୁଷେ କଥଂ ଗଙ୍ଗେ ! ॥ ୨୮॥

ଅମ୍ବ ! ତ୍ୱଦ୍ଦର୍ଶନତୋ ମୁକ୍ତିର୍ନ ସ୍ନାନଜଂ ଫଲଂ ଜାନେ ।
ଇତି ଯଦ୍ୱଦତି ବିପଶ୍ଚିତ୍ତଦଲୀକଃ ସ୍ନାନତସ୍ତ୍ରିମୂର୍ତିତ୍ୱମ୍ ॥ ୨୯॥

ତ୍ରିଗୁଣାଂଶଂ ପଙ୍କମାର୍ଷ୍ଟିଂ କର୍ତୁଂ ମର୍ତ୍ୟାସ୍ତ୍ୱୟି ପ୍ରମଜ୍ଜନ୍ତି ।
ତାନବିଶେଷେଣ ତ୍ୱଂ କରୋଷି ନିଜଲୀଲୟା ତ୍ରିଗୁଣମୂର୍ତୀନ୍ ॥ ୩୦॥

ଗଙ୍ଗେ ନଶ୍ୟତି ଜନନଂ ତ୍ୱନ୍ମଜ୍ଜନତୋ ବଦନ୍ତି ତଦଲୀକମ୍ ।
ଜନ୍ତୁନିବହୋ ନିମଜ୍ଜଁସ୍ତ୍ୱୟି ଭବତି ହି ଶଙ୍କରୋ ବିଧିର୍ୱିଷ୍ଣୁଃ ॥ ୩୧॥

ସ୍ୱର୍ଗାଦଧଃ ପତନ୍ତୀ ସ୍ୱୋର୍ଧ୍ୱଂ ଗଙ୍ଗେ ନିମଜ୍ଜତୋ ନୟସି ।
ସୋଢ୍ୱାଽପି ବିପଦ୍ଗଣମଥ ସନ୍ତଃ ପରକାର୍ୟସାଧନେ ବ୍ୟଗ୍ରାଃ ॥ ୩୨॥

ଗଙ୍ଗାପ୍ରାର୍ଥନାତରଙ୍ଗୋ ଗଙ୍ଗାଚରଣେ ସମର୍ପିତଃ ଶିଶୁନା ।
ସଗୁଣୋ ବିଗୁଣୋ ବା ସ୍ତାଂ ଶ୍ରାବ୍ୟଂ କଲଭାଷଣଂ ହି ଶିଶୋଃ ॥ ୩୩॥

ଇତି ଶ୍ରୀମଦାର୍ୟାଚାର୍ୟମୟୂରପଣ୍ଡିତାନୁଜସୂନବାଲକବିରଚିତୋ
ଗଙ୍ଗାର୍ଥନାତରଙ୍ଗଃ ଶିବାୟ ଭୂୟାତ୍ ॥