ଗଙ୍ଗାଷ୍ଟକମ୍ ୨ କାଲିଦାସକୃତମ୍
ଗଙ୍ଗାଷ୍ଟକମ୍ ୨ କାଲିଦାସକୃତମ୍
ଶ୍ରୀଗଣେଶାୟ ନମଃ ॥
କତ୍ୟକ୍ଷୀଣି କରୋଟୟଃ କତି କତି ଦ୍ୱୀପିଦ୍ୱିପାନାଂ ତ୍ୱଚଃ
କାକୋଲାଃ କତି ପନ୍ନଗାଃ କତି ସୁଧାଧାମ୍ନଶ୍ଚ ଖଣ୍ଡା କତି ।
କିଂ ଚ ତ୍ୱଂ ଚ କତି ତ୍ରିଲୋକଜନନିତ୍ୱଦ୍ୱାରିପୂରୋଦରେ
ମଜ୍ଜଜ୍ଜନ୍ତୁକଦମ୍ବକଂ ସମୁଦୟତ୍ୟେକୈକମାଦାୟ ଯତ୍ ॥ ୧॥
ଦେବି ତ୍ୱତ୍ପୁଲିନାଙ୍ଗଣେ ସ୍ଥିତିଜୁଷାଂ ନିର୍ମାନିନାଂ ଜ୍ଞାନିନାଂ
ସ୍ୱଲ୍ପାହାରନିବଦ୍ଧଶୁଦ୍ଧବପୁଷାଂ ତାର୍ଣଂ ଗୃହଂ ଶ୍ରେୟସେ ।
ନାନ୍ୟତ୍ର କ୍ଷିତିମଣ୍ଡଲେଶ୍ୱରଶତୈଃ ସଂରକ୍ଷିତୋ ଭୂପତେଃ
ପ୍ରାସାଦୋ ଲଲନାଗଣୈରଧିଗତୋ ଭୋଗୀନ୍ଦ୍ରଭୋଗୋନ୍ନତଃ ॥ ୨॥
ତତ୍ତତ୍ତୀର୍ଥଗତୈଃ କଦର୍ଥନଶତୈଃ କିଂ ତୈରନର୍ଥାଶ୍ରିତୈ-
ର୍ଜ୍ୟୋତିଷ୍ଟୋମମୁଖୈଃ କିମୀଶବିମୁଖୈର୍ୟଜ୍ଞୈରବଜ୍ଞାଦ୍ଦତୈ ।
ସୂତେ କେଶବବାସବାଦିବିବୁଧାଗାରାଭିରାମାଂ ଶ୍ରିୟଂ ଗଙ୍ଗେ
ଦେବି ଭବତ୍ତଟେ ଯଦି କୁଟୀବାସଃ ପ୍ରୟାସଂ ବିନା ॥ ୩॥
ଗଙ୍ଗାତୀରମୁପେତ୍ୟ ଶୀତଲଶିଲାମାଲମ୍ବ୍ୟ ହେମାଚଲୀଂ
ଯୈରାକର୍ଣି କୁତୂହଲାକୁଲତୟା କଲ୍ଲୋଲକୋଲାହଲଃ ।
ତେ ଶୃଣ୍ୱନ୍ତି ସୁପର୍ୱପର୍ୱତଶିଲାସିଂହାସନାଧ୍ୟାସନାଃ
ସଙ୍ଗୀତାଗମଶୁଦ୍ଧସିଦ୍ଧରମଣୀମଞ୍ଜୀରଧୀରଧ୍ୱନିମ୍ ॥ ୪॥
ଦୂରଂ ଗଚ୍ଛ ସକଚ୍ଛଗଂ ଚ ଭବତୋ ନାଲୋକୟାମୋ
ମୁଖଂ ରେ ପାରାକ ବରାକ ସାକମିତରୈର୍ନାକପ୍ରଦୈର୍ଗମ୍ୟତାମ୍ ।
ସଦ୍ୟଃ ପ୍ରୋଦ୍ୟତମନ୍ଦମାରୁତରଜଃପ୍ରାପ୍ତା କପୋଲସ୍ଥଲେ
ଗଙ୍ଗାମ୍ଭଃକଣିକା ବିମୁକ୍ତଗଣିକାସଙ୍ଗାୟ ସମ୍ଭାବ୍ୟତେ ॥ ୫॥
ବିଷ୍ଣୋଃ ସଙ୍ଗତିକାରିଣୀ ହରଜଟାଜୂଟାଟବୀଚାରିଣୀ
ପ୍ରାୟଶ୍ଚିତ୍ତନିବାରିଣୀ ଜଲକଣୈଃ ପୁଣ୍ୟୌଧବିସ୍ତାରିଣୀ ।
ଭୂଭୃତ୍କନ୍ଦରଦାରିଣୀ ନିଜଜଲେ ମଜ୍ଜଜ୍ଜନୋତ୍ତାରିଣୀ
ଶ୍ରେୟଃ ସ୍ୱର୍ଗବିହାରିଣୀ ବିଜୟତେ ଗଙ୍ଗା ମନୋହାରିଣୀ ॥ ୬॥
ବାଚାଲଂ ବିକଲଂ ଖଲଂ ଶ୍ରିତମଲଂ କାମାକୁଲଂ ବ୍ୟାକୁଲଂ
ଚାଣ୍ଡାଲଂ ତରଲଂ ନିପୀତଗରଲଂ ଦୋଷାବିଲଂ ଚାଖିଲମ୍ ।
କୁମ୍ଭୀପାକଗତଂ ତମନ୍ତକକରାଦାକୃଷ୍ୟ କସ୍ତାରୟେନ୍-
ମାତର୍ଜହ୍ନୁନରେନ୍ଦ୍ରନନ୍ଦିନି ତବ ସ୍ୱଲ୍ପୋଦବିନ୍ଦୁଂ ବିନା ॥ ୭॥
ଶ୍ଲେଷମଶ୍ଲେଷଣୟାନଲେଽମୃତବିଲେ ଶାକାକୁଲେ ବ୍ୟାକୁଲେ
କଣ୍ଠେ ଘର୍ଘରଘୋଷନାଦମଲିନେ କାୟେ ଚ ସମ୍ମୀଲତି ।
ଯାଂ ଧ୍ୟାୟନ୍ନ୍ପି ଭାରଭଙ୍ଗୁରତରାଂ ପ୍ରାପ୍ନୋତି ମୁକ୍ତିଂ ନରଃ
ସ୍ନାତୁଶ୍ୱେତସି ଜାହ୍ନ୍ୱୀ ନିବସତାଂ ସଂସାରସନ୍ତାପହୃତ୍ ॥ ୮॥
ଇତି ଶ୍ରୀମତ୍କାଲିଦାସବିରଚିତଂ ଗଙ୍ଗାଷ୍ଟକସ୍ତୋତ୍ରଂ ସମ୍ପୂର୍ଣମ୍ ॥
Comments
Post a Comment