ଗଙ୍ଗାଷ୍ଟକଂ ଶ୍ରୀବାଲ୍ମିକିବିରଚିତମ୍
ଗଙ୍ଗାଷ୍ଟକଂ ଶ୍ରୀବାଲ୍ମିକିବିରଚିତମ୍
ମାତଃ ଶୈଲସୁତା-ସପତ୍ନି ବସୁଧା-ଶୃଙ୍ଗାରହାରାବଲି
ସ୍ୱର୍ଗାରୋହଣ-ବୈଜୟନ୍ତି ଭବତୀଂ ଭାଗୀରଥୀଂ ପ୍ରାର୍ଥୟେ ।
ତ୍ୱତ୍ତୀରେ ବସତଃ ତ୍ୱଦମ୍ବୁ ପିବତସ୍ତ୍ୱଦ୍ୱୀଚିଷୁ ପ୍ରେଙ୍ଖତଃ
ତ୍ୱନ୍ନାମ ସ୍ମରତସ୍ତ୍ୱଦର୍ପିତଦୃଶଃ ସ୍ୟାନ୍ମେ ଶରୀରବ୍ୟଯଃ ॥ ୧॥
ତ୍ୱତ୍ତୀରେ ତରୁକୋଟରାନ୍ତରଗତୋ ଗଙ୍ଗେ ବିହଙ୍ଗୋ ପରଂ
ତ୍ୱନ୍ନୀରେ ନରକାନ୍ତକାରିଣି ବରଂ ମତ୍ସ୍ୟୋଽଥବା କଚ୍ଛପଃ ।
ନୈବାନ୍ୟତ୍ର ମଦାନ୍ଧସିନ୍ଧୁରଘଟାସଙ୍ଘଟ୍ଟଘଣ୍ଟାରଣ-
ତ୍କାରସ୍ତତ୍ର ସମସ୍ତବୈରିବନିତା-ଲବ୍ଧସ୍ତୁତିର୍ଭୂପତିଃ ॥ ୨॥
ଉକ୍ଷା ପକ୍ଷୀ ତୁରଗ ଉରଗଃ କୋଽପି ବା ବାରଣୋ ବାଽ-
ବାରୀଣଃ ସ୍ୟାଂ ଜନନ-ମରଣ-କ୍ଲେଶଦୁଃଖାସହିଷ୍ଣୁଃ ।
ନ ତ୍ୱନ୍ୟତ୍ର ପ୍ରବିରଲ-ରଣତ୍କିଙ୍କିଣୀ-କ୍ୱାଣମିତ୍ରଂ
ବାରସ୍ତ୍ରୀଭିଶ୍ଚମରମରୁତା ବୀଜିତୋ ଭୂମିପାଲଃ ॥ ୩॥
କାକୈର୍ନିଷ୍କୁଷିତଂ ଶ୍ୱଭିଃ କବଲିତଂ ଗୋମାୟୁଭିର୍ଲୁଣ୍ଟିତଂ
ସ୍ରୋତୋଭିଶ୍ଚଲିତଂ ତଟାମ୍ବୁ-ଲୁଲିତଂ ବୀଚୀଭିରାନ୍ଦୋଲିତମ୍ ।
ଦିବ୍ୟସ୍ତ୍ରୀ-କର-ଚାରୁଚାମର-ମରୁତ୍ସଂବୀଜ୍ୟମାନଃ କଦା
ଦ୍ରକ୍ଷ୍ୟେଽହଂ ପରମେଶ୍ୱରି ତ୍ରିପଥଗେ ଭାଗୀରଥୀ ସ୍ୱଂ ବପୁଃ ॥ ୪॥
ଅଭିନବ-ବିସବଲ୍ଲୀ-ପାଦପଦ୍ମସ୍ୟ ବିଷ୍ଣୋଃ
ମଦନ-ମଥନ-ମୌଲେର୍ମାଲତୀ-ପୁଷ୍ପମାଲା ।
ଜୟତି ଜୟପତାକା କାପ୍ୟସୌ ମୋକ୍ଷଲକ୍ଷ୍ମ୍ୟାଃ
କ୍ଷପିତ-କଲିକଲଙ୍କା ଜାହ୍ନବୀ ନଃ ପୁନାତୁ ॥ ୫॥
ଏତତ୍ତାଲ-ତମାଲ-ସାଲ-ସରଲବ୍ୟାଲୋଲ-ବଲ୍ଲୀଲତା-
ଚ୍ଛତ୍ରଂ ସୂର୍ୟକର-ପ୍ରତାପରହିତଂ ଶଙ୍ଖେନ୍ଦୁ-କୁନ୍ଦୋଜ୍ଜ୍ୱଲମ୍ ।
ଗନ୍ଧର୍ୱାମର-ସିଦ୍ଧ-କିନ୍ନରବଧୂ-ତୁଙ୍ଗସ୍ତନାସ୍ପାଲିତଂ
ସ୍ନାନାୟ ପ୍ରତିବାସରଂ ଭବତୁ ମେ ଗାଙ୍ଗଂ ଜଲଂ ନିର୍ମଲମ୍ ॥ ୬॥
ଗାଙ୍ଗଂ ବାରି ମନୋହାରି ମୁରାରି-ଚରଣଚ୍ୟୁତମ୍ ।
ତ୍ରିପୁରାରି-ଶିରଶ୍ଚାରି ପାପହାରି ପୁନାତୁ ମାମ୍ ॥ ୭॥
ପାପାପହାରି ଦୁରିତାରି ତରଙ୍ଗଧାରି
ଶୈଲପ୍ରଚାରି ଗିରିରାଜ-ଗୁହାବିଦାରି ।
ଝଙ୍କାରକାରି ହରିପାଦ-ରଜୋପହାରି
ଗାଙ୍ଗଂ ପୁନାତୁ ସତତଂ ଶୁଭକାରି ବାରି ॥ ୮॥
ଗଙ୍ଗାଷ୍ଟକଂ ପଠତି ଯଃ ପ୍ରୟତଃ ପ୍ରଭାତେ
ବାଲ୍ମୀକିନା ବିରଚିତଂ ଶୁଭଦଂ ମନୁଷ୍ୟଃ ।
ପ୍ରକ୍ଷାଲ୍ୟ ଗାତ୍ର-କଲିକଲ୍ମଷ-ପଙ୍କ-ମାଶୁ
ମୋକ୍ଷଂ ଲଭେତ୍ ପତତି ନୈବ ନରୋ ଭବାବ୍ଧୌ ॥ ୯॥
॥ ଇତି ବାଲ୍ମୀକିବିରଚିତଂ ଗଙ୍ଗାଷ୍ଟକଂ ସମ୍ପୂର୍ଣମ୍ ॥
Comments
Post a Comment