ଗୁରୁଗଙ୍ଗାଷ୍ଟକମ୍
ଗୁରୁଗଙ୍ଗାଷ୍ଟକମ୍
ଶ୍ରୀଗଣେଶାୟ ନମଃ ।
ମାତର୍ନନ୍ଦିକତୀର୍ଥସୁନ୍ଦରଭବେ ଶୈବୈରୁପାସ୍ୟେ ଶିବେ
ନିଃଶେଷାଘନିବାରିଣି ତ୍ୱମୁଦିରେ ସୌନ୍ଦର୍ୟରତ୍ନାକରେ ।
ଦେବାନୀକସୁସେବିତେ ସୁଖକରେ ସଂସାରତାପାପହେ
ଦୀନଂ ସୁଜ୍ଞଜନାଲିସେବିତପଦେ ତ୍ୱଂ ମାଂ ପବିତ୍ରଂ କୁରୁ ॥ ୧॥
ରୋଗାର୍ଦିତଂ ସଂସୃତିତାପତପ୍ତଂ ଷଟ୍କର୍ମହୀନଂ ତ୍ୱଘସମ୍ପ୍ଲୁତଂ ମାମ୍ ।
ନ ଚାପଗାନ୍ୟା ଭୁବନେ ତ୍ୱଦନ୍ୟା ନାଘଂ ପ୍ରକର୍ତୁଂ ଜନନୀ ଚ ତାଂ ଗତମ୍ ॥ ୨॥
ଜଗଜ୍ଜନନି ତ୍ୱଦ୍ୟଶୋ ଭୁବି ମହତ୍ସମୁଦ୍ୟତ୍ସଦା
ଜନାବଲି-ପବିତ୍ରତାଂ ପ୍ରକୁରୁତେଽତ୍ର ବିନ୍ଦୁସ୍ତବ ।
ଇତି ଶ୍ରବଣତୋ ମତିର୍ମମ ତବାମ୍ବୁସଂସେବନେ
ପବିତ୍ରମକରୋଷି ଚେଜ୍ଜନନି ତାଂ କଥଂ ତେ ସୁତେ ॥ ୩॥
ତ୍ୱଦମ୍ବୁସେବନାତ୍ସଦା ନିରାକୁଲା ଭବିନ୍ତ ତେ
ଖଗା ମୃଗାଃ ସୁରର୍ଷୟୋ ନରୋତ୍ତମାଃ ସୁରାସୁରାଃ ।
ସୁଭକ୍ତିୟୁକ୍ତଚେତସା ନରସ୍ତ୍ୱଦମ୍ବୁସେବନଂ
କରୋତି ଯଃ ସ ଯାତି ଧାମ ବୈଷ୍ଣବଂ ସୁରାର୍ଥିତମ୍ ॥ ୪॥
ଅସବୋ ଯଦି ଯାନ୍ତି ତ୍ୱତ୍ତଟେ ସ ନରୋ ଧନ୍ୟତୟା ଦିବଂ ପ୍ରୟାତି ।
ହରିନାମ ଇବାତ୍ର ତ୍ୱତ୍ତଟଂ ନ ବିମୁଞ୍ଚନ୍ତି କଦାପି ମାନବାଃ ॥ ୫॥
ତବ ତୀରନିବାସବର୍ଜିତା ନ ଜନିର୍ଜଗତୀତଲେ ମତା ସା ।
ନ ଯଥା ହରିନାମବର୍ଜିତା ରସନାୟା ବିଷବଲ୍ଲରୀ ମତା ସା ॥ ୬॥
ବିରଜାଗୁରୁଗଙ୍ଗେ ମେ ସିତାସିତେ ଯତ୍ର ସଙ୍ଗତେ ତତ୍ର ।
ଯଃ ପ୍ଲାବୟତି ଶରୀରଂ ସ ଯାତି ଭକ୍ତ୍ୟା ସୁମାଣିକଂ ଧାମ ॥ ୭॥
ତ୍ୱଦ୍ଦର୍ଶନାତ୍ତ୍ୱତ୍ସ୍ମରଣାତ୍ତବାମ୍ବୁସଂସେବନାନ୍ମାଣିକପାଦସମ୍ଭବେ ।
ଯତ୍ସୌକୃତଂ ତତ୍କଥନେ ନ ଶକ୍ତ୍ୟା ବ୍ରହ୍ମାଦୟସ୍ତତ୍ର କିୟାନହଂ ନରଃ ॥ ୮॥
ଗୁରୁଗଙ୍ଗାଷ୍ଟକମିଦଂ ପଠତାଂ ସର୍ୱସିଦ୍ଧିଦମ୍ ।
ପଠିତବ୍ୟଂ ସର୍ୱକାଲେ ଶୟନେ ଚ ବିଶେଷତଃ ॥ ୯॥
ଇତି ଗୁରୁଗଙ୍ଗାଷ୍ଟକଂ ସମ୍ପୂର୍ଣମ୍ ।
Comments
Post a Comment