ଗଙ୍ଗାପ୍ରବନ୍ଧଃ ଧୀରଜୟଦେବକୃତଃ
ଗଙ୍ଗାପ୍ରବନ୍ଧଃ
ଶ୍ରୀଗଣେଶାୟ ନମଃ ।
ମଧୁମଥନମୂର୍ତିବର ଇନ୍ଦୁକରକାମୁଖଂ ବହସି ବହୁ ବାରି ସୁତରଙ୍ଗେ ।
ହରିଚରଣନଖଭିଦୁରଜଗଦଣ୍ଡନିର୍ଗତା ବ୍ରହ୍ମଜଲପାତ୍ରକୃତସଙ୍ଗେ ॥ ୧॥
ନମୋ ଦେବି ଗଙ୍ଗେ ନମୋ ଦେବି ଗଙ୍ଗେ ହରନିଖିଲମଘମଲକନନ୍ଦେ ॥ ଧ୍ରୁବମ୍ ॥
ତ୍ୱମସି ଜନପାବନୀ ଚତୁରୁଦଧିଗାମିନୀ ସପ୍ତର୍ଷିକୁଲସୁକୃତସାରେ ।
କନକଗିରିଲଙ୍ଗିତେ ସକଲମୁନିବନ୍ଦିତେ ହରମୁକୁଟସିତକୁସୁମମାଲେ ॥ ୨॥
ସଗରସୁତସଙ୍ଗମେ ଲସଦମରସୁନ୍ଦରୀଦୂତିକେ ଦୁଷ୍କୃତିଦୁରାପେ ।
ନିରୟଗତିବାଧକେ ନିର୍ୱାଣସାଧକେ ଭକ୍ତଜନହୃତସନ୍ତାପେ । ନମୋ୦॥ ୩॥
ତୀର୍ଥବରକାରିଣୀ ପୂର୍ୱଜୋଦ୍ଧାରିଣୀ ହିମଶୈଲପାଷାଣଭେଦେ ।
ନାଗରଂ ପ୍ଲାବୟସି ପୂରୟସି ସାଗରଂ ସଙ୍ଗତା ବିନ୍ଧ୍ୟଗିରିପାଦେ ॥ ନମୋ୦॥ ୪॥
ଶୁଭସଲିଲନିଧୌତପୁଲିନବତି କୁର୍ୱତସ୍ତବ ନାମନିର୍ମଲାଲାପମ୍ ।
ବନ୍ଦିତା ବୀକ୍ଷିତା ଚିନ୍ତିତାବଗାହିତା ମଜ୍ଜିତା ମମ ହରସି ପାପମ୍ ॥ ନମୋ୦॥ ୫॥
ଇହ ନିଖିଲମୁନିଗଣୈରିହ ନିଖିଲସୁରଗଣୈରିହ ନିଖିଲବେଦୈରୁଦାରେ ।
ପୀୟସେ ଜୀୟସେ ସ୍ତୂୟସେ ଜନ୍ହୁମୁନିକନ୍ୟକେ ସଂସାରସାରେ ॥ ନମୋ୦॥ ୬॥
ଗଣ୍ଡୂଷମିହ ମେଽଘଶତମଧିଜୟତୁ ତବ କରନିକରଗମ୍ଭୀରତୋୟେ ।
ପରଲୋକବନ୍ଧୁରସି ସୁନ୍ଦରସିନ୍ଧୁରସି ତଟିନି ସୁରସଦନସାଧନୋପାୟେ ॥ ନମୋ୦॥ ୭॥
ଇତି ରାମଲକ୍ଷ୍ମଣକୌଶିକାନୁଜ୍ଞୟା ସୁରସରିତ୍ କୃତନମସ୍କାରଂ
ଭଣନ୍ତମିହ ସାଦରଂ ଧୀରଜୟଦେବକବିମୁତ୍ତାରୟସି ଭବଜଲଧିପାରମ୍ ॥ ନମୋ୦॥ ୮॥
ଇତି ଧୀରଜୟଦେବକୃତଃ ଗଙ୍ଗାପ୍ରବନ୍ଧଃ ସମ୍ପୂର୍ଣଃ ।
Comments
Post a Comment