ଗଙ୍ଗାଷ୍ଟକମ୍ ୧୦ ରବୀନ୍ଦ୍ରକୁମାର ସିଦ୍ଧାନ୍ତଶାସ୍ତ୍ରି କୃତଂ
ଗଙ୍ଗାଷ୍ଟକମ୍ ୧୦
ଶ୍ରୀଗଣେଶାୟ ନମଃ ।
ଗିରିରାଜସୁତାଂ ବିତୁଲାଂ ବିତତାଂ ତ୍ରିଦଶୈର୍ମହିତାଂ ବିୟତଃ ପତିତାମ୍ ।
କଲୁଷୈ ରହିତାଂ ନରଦେବହିତାଂ ପ୍ରଣମାମି ସିତାଂ ବହୁସତ୍ତ୍ୱୟୁତାମ୍ ॥ ୧॥
ଅତିପୂତଗତାମୃଷିରାଜନତାଂ ଭୁବନପ୍ରଥିତାମଭିଜାତଚିତାମ୍ ।
ମୁନିମାନିନୁତାଂ ମନୁଜୈରମିତାଂ ପ୍ରଣମାମି ସିତାଂ ମୁନିବକ୍ରମିତାମ୍ ॥ ୨॥
ଶିବଶୀର୍ଷଗତାଂ କଲନାଦୟୁତାଂ ଭୁଜଗେନ ନୁତାମଜବିଷ୍ଣୁହିତାମ୍ ।
ଅବିଗୀତମତାଂ କୃତସିନ୍ଧୁରତାଂ ପ୍ରଣମାମ୍ୟମୃତାଂ ହରିପାଦମୃତାମ୍ ॥ ୩॥
ଜନନୀବିନତାଂ ସୁରହସ୍ତିଗତାଂ ଦନୁଜୈରଜିତାଂ ତପସା ବିଜିତାମ୍ ।
ଜଲଦାନରତାଂ ଦୟଯା ବିଦିତାଂ ପ୍ରଣମାମ୍ୟମୃତାଂ ବହୁଭାଗ୍ୟଯୁତାମ୍ ॥ ୪॥
ଶ୍ରୁତିସାରମିତାଂ ସ୍ମୃତିଷୁ ପ୍ରଥିତାଂ କଲିଦୋଷକୃତାଂ ଶରଣଂ ପ୍ରଚିତାମ୍ ।
ଘୃତଦେବହୁତାଂ ଗୁଣିଭିଃ ପ୍ରଣତାଂ ପ୍ରଣମାମ୍ୟମୃତାଂ ବହୁଭାଗ୍ୟଯୁତାମ୍ ॥ ୫॥
ଜନତାକୁଲିତାଂ ବହୁଧା ଲଲିତାଂ କୃତରମ୍ୟରୁତାଂ ଶମନାଦିନୁତାମ୍ ।
ନରଲୋକଗତାଂ ପରମାର୍ଥୟୁତାଂ ପ୍ରଣମାମ୍ୟମୃତାମପରାଧିହିତାମ୍ ॥ ୬॥
ବହୁବେଣିୟୁତାଂ ଜଲଜାନହତାଂ ଯତିଭିର୍ମିଲିତାମଧିକାଶି ଶିତାମ୍ ।
ସ୍ଫଟିକୋପମିତାଂ ସ୍ତୁତିଗୀତିମତାଂ ପ୍ରଣମାମ୍ୟଜିତାମଧିରାଜନତାମ୍ ॥ ୭॥
ସକଲାସୁହିତାଂ ସତତାବହିତାଂ କୁଣପୈଃ ପିହିତାଂ ଚିକୁରାବଚିତାମ୍ ।
ବିହଗଧ୍ୱନିତାଂ ବିଧିପାତ୍ରମତାଂ ପ୍ରଣମାମ୍ୟଜିତାଂ ଶ୍ରୁତିସମ୍ପ୍ରଥିତାମ୍ ॥ ୮॥
ଇତି ରବୀନ୍ଦ୍ରକୁମାର ସିଦ୍ଧାନ୍ତଶାସ୍ତ୍ରି କୃତଂ ଗଙ୍ଗାଷ୍ଟକଂ ସମ୍ପୂର୍ଣମ୍ ।
Comments
Post a Comment