ଶ୍ରୀଗଙ୍ଗାସ୍ତୁତିଃ ଶ୍ରୀଧରସ୍ୱାମୀମହାରାଜବିରଚିତା
ଶ୍ରୀଗଙ୍ଗାସ୍ତୁତିଃ
ଶ୍ରୀହରେଶ୍ଚରଣାମ୍ବୁଜନିଃସୃତା ମଙ୍ଗଲା ଶିବମସ୍ତକଶୋଭନା ।
ପାବନା ଭବଦୁଃଖବିନାଶିନୀ ଭକ୍ତିଦା ସୁଖଦା ପରମୁକ୍ତିଦା ॥ ୧॥
ପାପହଂ ଭବତାପବିନାଶକଂ ଶାନ୍ତିଦଂ ସୁଖଦଂ ପରମୁକ୍ତିଦମ୍ ।
ଅମ୍ବ ତେ ସଲିଲଂ ପରମାମୃତଂ ମଜ୍ଜନଂ ତବ ଭୂମି ସୁଖାତ୍ମକମ୍ ॥ ୨॥
କିଂ ବର୍ଣୟାମି ଜଗଦମ୍ବ ତବାତ୍ର ଚିତ୍ରଂ
ମାହାତ୍ମ୍ୟମେତଦତିଶୁଦ୍ଧମନନ୍ତବୀର୍ୟମ୍ ।
ଶୁଦ୍ଧାତ୍ମଭିଃ ସକଲବିଦ୍ଭିରପାରକୀର୍ତିଃ
ସଂସ୍ତୂୟତେ ପରମଦିବ୍ୟପଦୈଃ ପବିତ୍ରୈଃ ॥ ୩॥
ପ୍ରଭାତସମୟଚ୍ଛବିସ୍ତବ ଶୁଭେ ମହାହ୍ଲାଦିନୀ
ମନଃ ପ୍ରଶମନଙ୍କରା ସକଲପାବନୀ ଜ୍ଞାନଦା ।
ସୁରର୍ଷିମୁନିସେବିତଂ ତବ ତଟଂ ନିମଜ୍ୟାପ୍ସୁ ତେ
ପୁନାତି ହୃଦୟଂ ତଥା ସକଲପାପିନାଂ ତତ୍କ୍ଷଣାତ୍ ॥ ୪॥
କ୍ୱଚିଚ୍ଛ୍ରୁତିମନୋହରଂ ସ୍ତବନମମ୍ବ ତେ ଶ୍ରୂୟତେ
କ୍ୱଚିତ୍ତବତଟୀଶ୍ରୁତିଶ୍ରବଣମଙ୍ଗଲା ସସ୍ୱରା ।
କ୍ୱଚିତ୍ସ୍ତିମିତଲୋଚନା ବୁଧଜନାଃ ସମାଧିସ୍ଥିତାଃ
କ୍ୱଚିତ୍ତବ ଜଲାଞ୍ଜଲିଂ ପରିଭୃତା ଜନା ଭୂସୁରାଃ ॥ ୫॥
ଉଦ୍ୟଦ୍ଭାସ୍କରରଶ୍ମୟଃ ସୁବିମଲାଃ ସକ୍ତାସ୍ତ୍ୱଦୀୟେ ଜଲେ
ବିଶ୍ୱାଭାସନମମ୍ବକାର୍ୟମଖିଲଂ କର୍ତୁଂ ଭୁବଃ ପ୍ରସ୍ଥିତାଃ ।
ଦିବ୍ୟାକୁଙ୍କମପୂଜନପ୍ରସରିତା ରକ୍ତାଙ୍ଗବର୍ଣପ୍ରଭା
କାପ୍ୟୁଲ୍ଲାସକରୀ ସତାଂ ବିଜୟତେ ଯା ଶର୍ମଦା ପାବନୀ ॥ ୬॥
ସୁପୁଷ୍ଟଫଲଭାରତଃ ପ୍ରବିନତାଃ ସୁବୃକ୍ଷା ଇମେ
ମହୋନ୍ନତିଶିରସ୍ଥିତାଂ ସୁଜନସଂସ୍ଥିତିଂ ତ୍ୱତ୍ତଟେ ।
ସ୍ଥିତାଃ ପରମଶୋଭିତାସ୍ସପଦି ଦର୍ଶୟନ୍ତୋ ମୁଦା
ତ୍ୱଦୀୟତଟସଂସ୍ଥିତା ସୁଖଘନବନଶ୍ରୀ ସଦା ॥ ୭॥
ଗ୍ରାମା ଗ୍ରାମଜନାସ୍ତଥୈବ ପଶବୋ ଯେ ପକ୍ଷିଣସ୍ତ୍ୱତ୍ତଟେ
ଧନ୍ୟାସ୍ତେ ପରିପୋଷିତାଃ ସୁବିମଲାସ୍ତ୍ୱତ୍ସ୍ନାନପାନାଦିଭିଃ ।
ଧନ୍ୟାସ୍ତେ ମୁନୟଃ ସମାଶ୍ରିତପଦେ ବୈରାଗ୍ୟବୃତ୍ତାସ୍ସଦା
ଜ୍ଞାନାନ୍ମୋକ୍ଷସୁଖୈଃ ସୁତୃପ୍ତିନିଲୟାଃ ସମ୍ପଦ୍ୟୁତାଃ ପାମରାଃ ॥ ୮॥
ଗଙ୍ଗେ ତ୍ୱଦୀୟପଦପଙ୍କଜମାତ୍ମତୃପ୍ତ୍ୟା
ଧ୍ୟାତ୍ୱାହମପ୍ୟବିଚଲଃ ସୁଖଭୂମରୂପମ୍ ।
ତ୍ୱଂ ବ୍ରହ୍ମରୂପସକଲାତ୍ମସୁଖଂ ବିଧାତ୍ରୀ
ରାରାଜସେ ସୁବିମଲା ଭୁବି ବ୍ରହ୍ମରୂପା ॥ ୯॥
ଇତି ଶ୍ରୀମତ୍ ପରମହଂସପରିବ୍ରାଜକାଚାର୍ୟ ସଦ୍ଗୁରୁ ଭଗବାନ୍
ଶ୍ରୀଧରସ୍ୱାମୀମହାରାଜବିରଚିତା ଶ୍ରୀଗଙ୍ଗାସ୍ତୁତିଃ ସମ୍ପୂର୍ଣା ।
ରଚନାସ୍ଥାନଂ - ଶ୍ରୀ କ୍ଷେତ୍ର ବରଦପୁର, ସଂବତ୍ସର - ୧୯୭୨
Comments
Post a Comment