ଗଙ୍ଗାସ୍ତବଃ ପ୍ରୟାଗଦତ୍ତବିରଚିତଃ
ଗଙ୍ଗାସ୍ତବଃ
ପ୍ରୟାତାଽଗାତ୍ତୁଙ୍ଗାଦ୍ୱିଧିଭବନରଙ୍ଗାଲୟତଲେ
ନିବାସାକାଶାଚ୍ଚେଦତିତପସ ଆଶୁପ୍ରପତିତା ।
ଅନଙ୍ଗାରେରଙ୍ଗାତ୍କନଖଲସୁସଙ୍ଗାତ୍ପ୍ରଚଲିତା
ପ୍ରୟାଗାତ୍ସା ଗଙ୍ଗା ପ୍ରକଟିତତରଙ୍ଗାଽର୍ଣବଗତା ॥ ୧॥
ଔଦାର୍ୟନ୍ତେଽନିବାର୍ୟଂ କଥୟ କଥମହୋ କାର୍ୟଧାର୍ୟପ୍ରପନ୍ନ
ମାସନ୍ନଂ ତେ ବିଲସତିଜନେ ଭୁକ୍ତିମୁକ୍ତିର୍ୱଦାମି ।
ସ୍ୱାମିତ୍ୱଂ ତ୍ୱଂ ଦିଶସି ନିତରାଂ ପାମରାଣାଂ ନରାଣାଂ
ମାନ୍ୟଂ ନାନ୍ୟଂ ଭୁବନଭବନେ ଯତ୍ପରଂ ପ୍ରାର୍ଥୟାମି ॥ ୨॥
ଗାଙ୍ଗେ ଜଲେ ଯଃ ପ୍ରବିଗାହତେ ତେଽମୃତେ ଚ ଶେତେଽହିପତେଃ ଶରୀରେ ।
ତୀରେ ଗତା ଯେ ଦୁରିତାବୃତାଙ୍ଗାଃ ସାଙ୍ଗାଃ ପରୀବାରୟୁତା ବିଶୁଦ୍ଧାଃ ॥ ୩॥
ପାପୀ ତାପୀ ସଶାପୀ ସୁରସରିଦବନୋ ମଧ୍ୟଗୋ ଯଃ ସୁରାପୀ
କାପୀୟଞ୍ଚାଭିତାପୀ ସଦୟହୃଦୟତଶ୍ଚେତ୍ପ୍ରତାପୀ ଚ ଜାପୀ ।
ଦାତା ମାତା ଜନକଗୁରୁଗୋଭକ୍ତିୟୁକ୍ତଃ ପ୍ରୟାତି
ଶମ୍ଭୁତ୍ୱଂ ତେ ଜଲଲବୟୁତଶ୍ଚୋଦ୍ଧୃତିର୍ୱୈ ବିଚିତ୍ରା ॥ ୪॥
ଦାନୈର୍ଜ୍ଞାନୈଶ୍ଚ ଗାନୈର୍ୱ୍ରତନିୟମଗଣୈର୍ୟୋଗୟାଗାବଦାନୈ-
ର୍ୟାନୈର୍ୱାୟୋର୍ୱିଧାନୈର୍ଜପଭଜନଦୟାତୀର୍ଥୟାତ୍ରାଦିକାନାମ୍ ।
ସନ୍ମାନୈର୍ଭୂସୁରାଣାଂ ଦିଶତି ହରିହରାବାତ୍ମଲୋକଂ ହି ଗଙ୍ଗେ !
ପାପୀନାଂ ତ୍ୱଂ ବିନୈଭିର୍ହରିହରମକରୋତ୍କୋ ବଦାଗ୍ରସ୍ତଦନ୍ୟଃ ॥ ୫॥
ଗଙ୍ଗେଽତି ଚିନ୍ତା ହୃଦୟେ ମଦୀୟେ ଲୋକୈସ୍ତିରସ୍କାରବୃତଂ ଶରୀରମ୍ ।
କ୍ଲିନ୍ନଂ ଗଲତ୍କୁଷ୍ଠୟୁତଂ ବିଭିନ୍ନଂ ଛିନ୍ନଂ କଥଂ ବିଷ୍ଣୁଶିବଂ କରୋଷି ॥ ୬॥
ନାଶ୍ଚର୍ୟମେତ୍ତବ ଲୋକମାତର୍ମାତାଽଽତ୍ମପୁତ୍ରଂ କୁରୁତେ ପବିତ୍ରମ୍ ।
ମୂତ୍ରୈର୍ମଲେଧୂଲିଭିରାବୃତଂ ତଂ ସ୍ୱାଙ୍କେ କରୋତ୍ୟମ୍ବୁନିଜାଞ୍ଚଲୈଶ୍ଚ ॥ ୭॥
ଚିତ୍ରଗୁପ୍ତ ଇହ ଯସ୍ୟ ପାତକେ ଲେଖନେନ ଶିଥିଲୀକୃତାଙ୍ଗୁଲିଃ ।
ତାରୟେଦ୍ୟଦି ମହତ୍ତ୍ୱମମ୍ବ ! ତତ୍ତେ ଦ୍ୱିଜେ ଖଲୁ ପ୍ରୟାଗଦତ୍ତକେ ॥ ୮॥
ଇତି ଶ୍ରୀମଦ୍ରାମକୁମାରାତ୍ମଜପ୍ରୟାଗଦତ୍ତବିରଚିତଃ ଗଙ୍ଗାସ୍ତବଃ ସମାପ୍ତଃ ।
https://ganja-upasana.blogspot.com/2025/02/blog-post_36.html
Comments
Post a Comment