ଗଙ୍ଗାଷ୍ଟକମ୍ ସ୍ୱାମି-ଶ୍ରୀମଦନନ୍ତାନନ୍ଦସରସ୍ୱତୀବିରଚିତଂ
ଗଙ୍ଗାଷ୍ଟକମ୍
ନ ଶକ୍ତାସ୍ତ୍ୱାଂ ସ୍ତୋତୁଂ ବିଧିହରିହରା ଜହ୍ନତନୟେ
ଗୁଣୋତ୍କର୍ଷାଖ୍ୟାନଂ ତ୍ୱୟି ନ ଘଟତେ ନିର୍ଗୁଣପଦେ ।
ଅତସ୍ତେ ସଂସ୍ତୁତ୍ୟୈ କୃତମତିରହଂ ଦେବି ସୁଧିୟାଂ
ବିନିନ୍ଦ୍ୟୋ ଯଦ୍ୱେଦାଶ୍ଚକିତମଭିଗାୟନ୍ତି ଭବତୀମ୍ ॥ ୧॥
ତଥାଽପି ତ୍ୱାଂ ପାପଃ ପତିତଜନତୋଦ୍ଧାରନିପୁଣେ
ପ୍ରବୃତ୍ତୋଽହଂ ସ୍ତୋତୁଂ ପ୍ରକୃତିଚଲୟା ବାଲକଧିୟା ।
ଅତୋ ଦୃଷ୍ଟୋତ୍ସାହେ ଭବତି ଭବଭାରୈକଦହନେ
ମୟି ସ୍ତୁତ୍ୟେ ଗଙ୍ଗେ କୁରୁ ପରକୃପାଂ ପର୍ୱତସୁତେ ॥ ୨॥
ନ ସଂସାରେ ତାବତ୍କଲୁଷମିହ ଯାବତ୍ତବ ପୟୋ
ଦହତ୍ୟାର୍ୟେ ସଦ୍ୟୋ ଦହନ ଇବ ଶୁଷ୍କଂ ତୃଣଚୟମ୍ ।
ପଲାୟନ୍ତେ ଦୃଷ୍ଟ୍ୱା ତବ ପରିଚରାନନ୍ତକଜନା
ଯଥା ବନ୍ୟା ବାଽନ୍ୟେ ବନପତିଭୟାଦ୍ ବାମନମୃଗାଃ ॥ ୩॥
ଜନା ଯେ ତେ ମାତର୍ନିଧନସମୟେ ତୋୟକଣିକାଂ
ମୁଖେ କୃତ୍ୱା ପ୍ରାଣାଞ୍ଜହତି ସୁରସଙ୍ଘୈରନୁବୃତା ।
ବିମାନେ କ୍ରୀଡନ୍ତୋଽମରପତିପଦଂ ଯାନ୍ତି ନିୟତଂ
କଥା ତେଷାଂ କା ବା ଜନନି ତବ ତୀରେ ନିବସତାମ୍ ॥ ୪॥
ଶିବଃ ସର୍ୱାରାଧ୍ୟୋ ଜନନି ବିଷତାପୋପଶମନଂ
ଚରୀକର୍ତୁଂ ଗଙ୍ଗେ କଲିକଲୁଷଭଙ୍ଗେ ପଶୁପତିଃ ।
ଜଟାୟାଂ ସନ୍ଧତ୍ତ ଲଲିତଲହରୀଂ ତ୍ୱାଂ ସୁରନଦୀ
ତ୍ୱଦନ୍ୟା କା ବନ୍ଦ୍ୟା ପରମମହିତା ବା ତ୍ରିଭୁବନେ ॥ ୫॥
ଜନସ୍ତାବନ୍ମାତର୍ଦୁରିତଭୟତୋ ବିଭ୍ୟତି ସୃତୌ
ନ ଯାବତ୍ତ୍ୱତ୍ତୀରଂ ନୟନପଥମାୟାତି ବିମଲମ୍ ।
ଯଦାପ୍ତଂ ତ୍ୱତ୍ତୀରଂ ତଦନୁ ଦୁରିତାନାଂ ନ ଗଣନା
ତତୋ ଗଙ୍ଗେ! ବନ୍ଦ୍ୟା ମୁନିସମୁଦୟାସ୍ତ୍ୱାଂ ନ ଜହତି ॥ ୬॥
ନମାମି ତ୍ୱାଂ ଗଙ୍ଗେ ଶ୍ରୁତିବନବିହାରୈକନିପୁଣେ
ଜଗନ୍ମାତର୍ମାତସ୍ତ୍ରିପୁରହରସେବ୍ୟେ ବିଧିନୁତେ ।
ତ୍ୱମେବାଦ୍ୟା ଦୁର୍ଗା ଜନହିତକୃତେ ତ୍ୱଂ ଦ୍ରବମୟୀ
ସ୍ୱୟଂ ଜାତା ଦେବି ତ୍ୱମସି ପରମଂ ବ୍ରହ୍ମ ବିଦିତମ୍ ॥ ୭॥
କଦା ଗଙ୍ଗେ ରମ୍ୟେ ତଟମଧିବସସ୍ତେ ଶିବନୁତେ
ଶିବେ ଦୁର୍ଗେ ମାତଃ ସକଲଫଲଦେ ଦେବଦୟିତେ ।
ପରେଶେ ସର୍ୱେଶେ ଶ୍ରୁତିଶତନୁତେ ଦକ୍ଷତନୟେ
ସଦାଽହଂ ସଞ୍ଜଲ୍ପନ୍ନିମିଷମିବ ନେଷ୍ୟାମି ଦିବସାନ୍ ॥ ୮॥
ଗଙ୍ଗାଷ୍ଟକମିଦଂ ପୁଣ୍ୟଂ ପ୍ରଭାତେ ଯଃ ପଠେଚ୍ଛୁଚିଃ ।
ସର୍ୱାଭୀଷ୍ଟଂ ତତସ୍ତସ୍ମୈ ଦଦାତି ସୁରନିମ୍ନଗା ॥ ୯॥
ଇତି ସ୍ୱାମି-ଶ୍ରୀମଦନନ୍ତାନନ୍ଦସରସ୍ୱତୀବିରଚିତଂ ଗଙ୍ଗାଷ୍ଟକଂ ସମ୍ପୂର୍ଣମ୍ ।
https://ganja-upasana.blogspot.com/2025/02/blog-post_49.html
Comments
Post a Comment