ଶ୍ରୀଗଙ୍ଗାସ୍ତୋତ୍ରମ୍ ଶ୍ରୀମଚ୍ଛଙ୍କରାଚାର୍ୟବିରଚିତଂ

 ଶ୍ରୀଗଙ୍ଗାସ୍ତୋତ୍ରମ୍

ଦେବି ସୁରେଶ୍ୱରି ଭଗବତି ଗଙ୍ଗେ ତ୍ରିଭୁବନତାରିଣି ତରଲତରଙ୍ଗେ ।
ଶଙ୍କରମୌଲିବିହାରିଣି ବିମଲେ ମମ ମତିରାସ୍ତାଂ ତବ ପଦକମଲେ ॥ ୧॥

ଭାଗୀରଥି ସୁଖଦାୟିନି ମାତସ୍ତବ ଜଲମହିମା ନିଗମେ ଖ୍ୟାତଃ ।
ନାଽହଂ ଜାନେ ତବ ମହିମାନଂ ପାହି କୃପାମୟି ମାମଜ୍ଞାନମ୍ ॥ ୨॥

ହରିପଦପାଦ୍ୟତରଙ୍ଗିଣି ଗଙ୍ଗେ ହିମବିଧୁମୁକ୍ତାଧବଲତରଙ୍ଗେ ।
ଦୂରୀକୁରୁ ମମ ଦୁଷ୍କୃତିଭାରଂ କୁରୁ କୃପୟା ଭବସାଗରପାରମ୍ ॥ ୩॥

ତବ ଜଲମମଲଂ ଯେନ ନିପୀତଂ ପରମପଦଂ ଖଲୁ ତେନ ଗୃହୀତମ୍ ।
ମାତର୍ଗଙ୍ଗେ ତ୍ୱୟି ଯୋ ଭକ୍ତଃ କିଲ ତଂ ଦ୍ରଷ୍ଟୁଂ ନ ଯମଃ ଶକ୍ତଃ ॥ ୪॥

ପତିତୋଦ୍ଧାରିଣି ଜାହ୍ନବି ଗଙ୍ଗେ ଖଣ୍ଡିତଗିରିବରମଣ୍ଡିତଭଙ୍ଗେ ।
ଭୀଷ୍ମଜନନି ହେ ମୁନିବରକନ୍ୟେ ପତିତନିବାରିଣି ତ୍ରିଭୁବନଧନ୍ୟେ ॥ ୫॥

କଲ୍ପଲତାମିବ ଫଲଦାମ୍ ଲୋକେ ପ୍ରଣମତି ଯସ୍ତ୍ୱାଂ ନ ପତତି ଶୋକେ ।
ପାରାବାରବିହାରିଣି ଗଙ୍ଗେ ବିମୁଖୟୁବତିକୃତତରଲାପାଙ୍ଗେ ॥ ୬॥

ତବ ଚେନ୍ମାତଃ ସ୍ରୋତଃ ସ୍ନାତଃ ପୁନରପି ଜଠରେ ସୋଽପି ନ ଜାତଃ ।
ନରକନିବାରିଣି ଜାହ୍ନବି ଗଙ୍ଗେ କଲୁଷବିନାଶିନି ମହିମୋତ୍ତୁଙ୍ଗେ ॥ ୭॥

ପୁନରସଦଙ୍ଗେ ପୁଣ୍ୟତରଙ୍ଗେ ଜୟ ଜୟ ଜାହ୍ନବି କରୁଣାପାଙ୍ଗେ ।
ଇନ୍ଦ୍ରମୁକୁଟମଣିରାଜିତଚରଣେ ସୁଖଦେ ଶୁଭଦେ ଭୃତ୍ୟଶରଣ୍ୟେ ॥ ୮॥

ରୋଗଂ ଶୋକଂ ତାପଂ ପାପଂ ହର ମେ ଭଗବତି କୁମତିକଲାପମ୍ ।
ତ୍ରିଭୁବନସାରେ ବସୁଧାହାରେ ତ୍ୱମସି ଗତିର୍ମମ ଖଲୁ ସଂସାରେ ॥ ୯॥ ଗତିର୍ମୟ

ଅଲକାନନ୍ଦେ ପରମାନନ୍ଦେ କୁରୁ କରୁଣାମୟି କାତରବନ୍ଦ୍ୟେ ।
ତବ ତଟନିକଟେ ଯସ୍ୟ ନିବାସଃ ଖଲୁ ବୈକୁଣ୍ଠେ ତସ୍ୟ ନିବାସଃ ॥ ୧୦॥

ବରମିହ ନୀରେ କମଠୋ ମୀନଃ କିଂ ବା ତୀରେ ଶରଟଃ କ୍ଷୀଣଃ ।
ଅଥବା ଶ୍ୱପଚୋ ମଲିନୋ ଦୀନସ୍ତବ ନ ହି ଦୂରେ ନୃପତିକୁଲୀନଃ ॥ ୧୧॥

ଭୋ ଭୁବନେଶ୍ୱରି ପୁଣ୍ୟେ ଧନ୍ୟେ ଦେବି ଦ୍ରବମୟି ମୁନିବରକନ୍ୟେ ।
ଗଙ୍ଗାସ୍ତବମିମମମଲଂ ନିତ୍ୟଂ ପଠତି ନରୋ ଯଃ ସ ଜୟତି ସତ୍ୟମ୍ ॥ ୧୨॥

ଯେଷାଂ ହୃଦୟେ ଗଙ୍ଗାଭକ୍ତିସ୍ତେଷାଂ ଭବତି ସଦା ସୁଖମୁକ୍ତିଃ ।
ମଧୁରାକାନ୍ତାପଞ୍ଝଟିକାଭିଃ ପରମାନନ୍ଦକଲିତଲଲିତାଭିଃ ॥ ୧୩॥

ଗଙ୍ଗାସ୍ତୋତ୍ରମିଦଂ ଭବସାରଂ ବାଞ୍ଛିତଫଲଦମ୍ ବିମଲଂ ସାରମ୍ ।
ଶଙ୍କରସେବକଶଙ୍କରରଚିତଂ ପଠତି ସୁଖୀସ୍ତବ ଇତି ଚ ସମାପ୍ତଃ ॥ ୧୪॥

॥ ଇତି ଶ୍ରୀମଚ୍ଛଙ୍କରାଚାର୍ୟବିରଚିତଂ ଗଙ୍ଗାସ୍ତୋତ୍ରଂ ସମ୍ପୂର୍ଣମ୍ ॥

 ଗଙ୍ଗାସ୍ତୋତ୍ରମ୍ ୩  ସମୟାଚାରତନ୍ତ୍ରେ

https://ganja-upasana.blogspot.com/2025/02/blog-post_56.html