ତୀର୍ଥଗଣୈଃ କୃତା ଗଙ୍ଗାସ୍ତୁତିଃ

 ତୀର୍ଥଗଣୈଃ କୃତା ଗଙ୍ଗାସ୍ତୁତିଃ

ତୀର୍ଥାନ୍ୟୂଚୁଃ ।
ଓଁ ନମୋ ବିମଲବଦନାୟୈ ଭୂର୍ଭୁବଃସ୍ୱଃପରମହଃକଲାୟୈ କେବଲପରମାନନ୍ଦସନ୍ଦୋହରୂପାୟୈ ଲୋକତ୍ରୟାମୀବବଲାକାତିମିରାପସାରକପରମଜ୍ୟୋତିରୂପାୟୈ ଅସଦପଲାପତିକ୍ତରସଦୂଷିତରସନାଦୋଷାପସାରଣପରମାମୃତରସରସାୟନାମୃତରୂପାୟୈ । ମୂର୍ତ୍ତିମତ୍ୟୈ କୋଟିକୋଟିଚନ୍ଦ୍ରଧବଲାୟୈ ମକରାସନାୟୈ ତେ ॥ ଗଙ୍ଗେ ଦେବି ସ୍ୱର୍ଧୁନି ବିଷ୍ଣୁପାଦୋଦ୍ଭବେ ଦ୍ରବମୟନାରାୟଣତୈଜସଶୀରଦ୍ରବଶରୀରେ ପରମାତ୍ମନ୍ ପ୍ରସୀଦ ପ୍ରସୀଦ ତେ ନମୋ ନମଃ ॥

ନମସ୍ତେ ଦେବଦେବେଶି ଗଙ୍ଗେ ତ୍ରିପଥଗାମିନି ।
ତ୍ରିଲୋଚନେ ଶ୍ୱେତରୂପେ ବ୍ରହ୍ମବିଷ୍ଣୁଶିବାର୍ଚ୍ଚିତେ ॥ ୧॥

ବେଗଖଣ୍ଡିତବ୍ରହ୍ମାଣ୍ଡକଟାହେ ଦୋଷଖଣ୍ଡିନି ।
ରତ୍ନକୋଟିକିରୀଟେନ ମଣ୍ଡିତାମଲମସ୍ତକେ ॥ ୨॥

ଦେବେଦେବ୍ୟାଦିକୈରୀଟସ୍ପୃଷ୍ଟପାଦାମ୍ବୁଜଦ୍ୱୟେ ।
କାମଦେ କାମରୂପାସି ତୀର୍ଥାନାଞ୍ଚ ପ୍ରସୂରସି ॥ ୩॥

ଶ୍ୟାମେ ଶ୍ୟାମଲସଚ୍ଚାରୁକୁଞ୍ଚିତାମଲକୁନ୍ତଲେ ।
ଶିବପ୍ରିୟେ ଶିବାରାଧ୍ୟେ ଶିବଶୀର୍ଷକୃତାଲୟେ ॥ ୪॥

ଶିବେ ଶିବପ୍ରଦେ ଶୈବଂ କୁର୍ୱାଣା ନିଖିଲଂ ଜଗତ୍ ।
ଅଚ୍ୟୁତେଽଚ୍ୟୁତଭୂଷାଢ୍ୟେ ଅଚ୍ୟୁତାଙ୍ଘ୍ରିସମୁଦ୍ଭବେ ॥ ୫॥

ଅଚ୍ୟୁତାତ୍ମକଦାବ୍ଜେ ଧରାଗମନପାବନେ ।
ଅଚ୍ୟୁତପ୍ରେମଧାରାଢ୍ୟା ବ୍ରହ୍ମାଣୀ ବ୍ରହ୍ମରୂପିଣୀ ॥ ୬॥

ବ୍ରହ୍ମାନନ୍ଦମୟୀ ବ୍ରହ୍ମପ୍ରସୂର୍ବ୍ରହ୍ମରସାମୃତା ।
ବ୍ରହ୍ମତ୍ୱଦାୟିନୀ ବ୍ରହ୍ମନଦୀ ସୁରଧୁନୀ ସୁରା ॥ ୭॥

ଭେଦଶୂନ୍ୟାଽଭେଦକାରୀଭେଦକପ୍ରାଣହାରିଣୀ ।
ଅଭେଦବୁଦ୍ଧିରୂପାସି ଅଭେଦବୁଦ୍ଧିମତ୍ପ୍ରିୟେ ॥ ୮॥

ସତ୍ୟପ୍ରପଞ୍ଚରହିତେ ଅନିନ୍ଦ୍ୟେଦୋଷବର୍ଜ୍ଜିତେ ।
କମଲେ ବିମଲେ ଶୁଦ୍ଧେ ତତ୍ତ୍ୱବ୍ରହ୍ମପରାତ୍ମିକେ ॥ ୯॥

ବେଗାଧାରେ ବେଗଗମେ ସ୍ଥିରବାୟୁପ୍ରଭେଦିନି ।
ସୂର୍ୟମଣ୍ଡଲସମ୍ଭିନ୍ନେ ମନ୍ଦାକିନି ମହେଶ୍ୱରି ॥ ୧୦॥

ସୁରାର୍ଚିତେ ମହାମଲ୍ଲେ କୋକାମୁଖି ରଣପ୍ରିୟେ ।
ବଲିମାଂସପ୍ରିୟେ କାଲି ମତ୍ସ୍ୟାସବସୁଖଗ୍ରହେ ॥ ୧୧॥

ଜବାରକ୍ତାକ୍ଷି ଲୋଲାକ୍ଷି ରକ୍ତବସ୍ତ୍ରପିଧାୟିନି ।
ନିଃଶଙ୍କସେବ୍ୟେ ନିଃସେବ୍ୟେ ନିଷ୍କିଞ୍ଚନଜନପ୍ରିୟେ ॥ ୧୨॥

ଦିଗମ୍ବରପ୍ରିୟେ ଦିବ୍ୟେ ବୀରରୂପେ ମନୋହରେ ।
ଆକାଶନିଲୟେ ଦେବି ସଦା ପର୍ୱତବାସିନି ॥ ୧୩॥

ଧରାଲୟେ ଚ ପାତାଲନିଲୟେ ଖେଚରେ ଚରେ ।
ସଦା ଖଡ୍ଗକରେ ଭୀମେ ମହାଭୈରବସାଧିତେ ॥ ୧୪॥

ଭୟହାରେ ଭୟାଧାରେ ଭବପତ୍ରି ଭବାନଲେ ।
ଭାବଜ୍ଞେ ଭାବରସିକେ ଗିରିଜେ ଗିରିଶୃଙ୍ଗଗେ ॥ ୧୫॥

ଶୃଙ୍ଗାଟକଗତେ କାନ୍ତେ ଶୃଙ୍ଗାରରସଶୋଭନେ ।
କାମରୂପେ କାମଭବେ କାମନାଭବମନ୍ମଥେ ॥ ୧୬॥

ଦୁର୍ଗମେ ଦୁର୍ଗତିହରେ ଦୁଃଖହନ୍ତ୍ରି ସୁଖାଲୟେ ।
ହଂସକାରଣ୍ଡବକ୍ରୌଞ୍ଚମଣ୍ଡିକୂଲଦ୍ୱୟେ ଶୁଭେ ॥ ୧୭॥

ଦେବାନୀସେବିତତଟେ ସ୍ମୃତିପାପବିନାଶିନି ।
ବ୍ରହ୍ମହତ୍ୟାଦିପାପେଷୁ ନାମମାତ୍ରହମହାଶନେ ॥ ୧୮॥

ସୁଖଦେ ମୋକ୍ଷଦେ ମାତଃ ସର୍ୱେଷାଂ ଜଗତାମପି ।
ଚାଣ୍ଡାଲଗୃହିସନ୍ନ୍ୟାସି-ଯୋଗିସେବ୍ୟା ଚ ଯୋଗିନୀ ॥ ୧୯॥

ବିଷୟାଖ୍ୟବିଷଜ୍ୱାଲାହରେ ବିଷହରେ ହରେ ।
ହାରେ ଦଶହରେ ଗଙ୍ଗେ କଲିପାପହରେ ପରେ ॥ ୨୦॥

ହୁଙ୍କାରରୂପେ ପ୍ରଣବସ୍ୱରୂପେ ହ୍ରୀଂସ୍ୱରୂପିଣି ।
ଅମ୍ବିକେ ଭଗବତ୍ୟମ୍ବ ଭୀଷ୍ମସୂସ୍ତେ ନମୋ ନମଃ ॥ ୨୧॥

ଇଷ୍ଟସିଦ୍ଧିକରେ ସ୍ଫେଂ ସ୍ଫୌଂ ହ୍ରୌଂ ହ୍ରାଂ ସ୍ୱାହାସ୍ୱରୂପିଣୀ ।
ବିମଲମୁଖି ଚନ୍ଦ୍ରମୁଖି କୋଲାହଲେ ସର୍ୱେ ପ୍ରସୀଦ ॥ ୨୨॥

ରାଜଲକ୍ଷ୍ମୀଶ୍ଚ ଭୂପାନାଂ ଗୃହିଣାଂ ଗୃହିଣୀ ଶୁଭା ।
ଯୋଗିନାଂ ଯୋଗ ଏବ ତ୍ୱଂ ମତିଃ ସନ୍ନ୍ୟାସିନାମପି ॥ ୨୩॥

କବୀନାଂ ବିଶ୍ୱତୋଦୃଷ୍ଟିର୍ବୁଦ୍ଧିସ୍ତ୍ୱଂ ରାଜସେବିନାମ୍ ।
ଲଜ୍ଜାଽସି ଚ କୁଲସ୍ତ୍ରୀଣାଂ ବାଲାନାଂ ମଧୁରା ଚ ଗୀଃ ॥ ୨୪॥

ଭବତୀ ସମରେ ସ୍ପର୍ଦ୍ଧା ସାଧୂନାଞ୍ଚ କ୍ଷମା ଖଲୁ ।
ସରସ୍ୱତୀଂ ଚ ବାଲ୍ମୀକେ ବ୍ୟାସେ ବାଚାଲତା ତଥା ॥ ୨୫॥

ଶ୍ରୁତିଃ ସ୍ମୃତିଶ୍ଚ ସଞ୍ଜ୍ଞା ଚ କବିତାଲହରୀ ତଥା ।
ଗତିସ୍ତ୍ୱମେବ ଭୂତାନାଂ ମତ୍ସ୍ୟାନାମୁଦକଂ ଯଥା ॥ ୨୬॥

ଜାଡ୍ୟହନ୍ତ୍ରୀ ମନ୍ତ୍ରରୂପା କାଲରୂପା କପାଲିନୀ ।
କୁମାରୀ ତରୁଣୀ ବୃଦ୍ଧା ରସଜ୍ଞା ରସସୁନ୍ଦରୀ ॥ ୨୭॥

ସ୍ୱର୍ଗେ ମନ୍ଦାକିନୀ ତ୍ୱଂ ହି ଦେବଦେବୀନିଷେବିତା ।
କ୍ଷିତାବଲକନନ୍ଦା ତ୍ୱଂ କୃତାର୍ଥାନ୍ କୁରୁଷେ ନରାନ୍ ॥ ୨୮॥

ପାତାଲେ ନାଗଲୋକାଦ୍ୟୈର୍ଭୋଗବତ୍ୟସି ସେବିତା ।
ପୂର୍ୱସ୍ୟାଂ ଦିଶି ସୀତା ତ୍ୱଂ ଭଦ୍ରାଖ୍ୟା ଚୋତ୍ତରତ୍ର ବୈ ॥ ୨୯॥

ପଶ୍ଚିମସ୍ୟାଂ ହି ବଙ୍କ୍ଷୁସ୍ତ୍ୱମଲକନନ୍ଦା ଚ ଦକ୍ଷିଣେ ।
ବ୍ରାହ୍ମୀ ତ୍ୱଂ ବୈଷ୍ଣବୀ ଶୈବୀ କୁମାରୀ ଯୁବତୀ ତଥା ॥ ୩୦॥

କପାଲମାଲିନୀ ଚ ତ୍ୱଂ ବିକଟାକ୍ଷା ସରସ୍ୱତୀ ।
ଶ୍ମଶାନବାସିନୀ ଚ ତ୍ୱଂ ଚିତାଙ୍ଗାରାସ୍ଥିସଞ୍ଚୟା ॥ ୩୧॥

ସରସ୍ୱତୀ ଜାହ୍ନବୀ ଚ ଗଙ୍ଗା ଭାଗୀରଥୀ ଶୁଭେ ।
ହଂସୀ ପଦ୍ମମୁଖୀ ପଦ୍ମସହସ୍ତ୍ରଦଲବାସିନୀ ॥ ୩୨॥

ବୟଂ ତୁ ମାତଃ ପରମମଙ୍ଗଲାୟନବାସାବଗାହଦର୍ଶନସ୍ମରଣେନ ବିଶ୍ୱାନି ତୀର୍ଥାନି କିଲେତରଥା ଯେ ପୁନସ୍ତ୍ୱୟି ଭକ୍ତାସ୍ତାନ୍ୱୟଂ ପୁନୀମହେ ତଦ୍ୱିଭୂତିବିଶେଷଦିଦୃକ୍ଷୟା ତତ୍ର ତତ୍ର ଭ୍ରମତଃ । ତ୍ୱୟ୍ୟଭକ୍ତାଂସ୍ତୁ ଦୂରତସ୍ତ୍ୟଜାମହେ । ତ୍ୱଂ ପୁନସ୍ତତ୍ତନ୍ମୟତ୍ୱାଦ୍ଦେବାନାଂ ତୀର୍ଥାନାଂ ଧର୍ମାଣାଂ ମାତା ସର୍ୱସାକ୍ଷିଣୀ ପ୍ରଣମ୍ୟସେ ଶତଶଃ । ପ୍ରାଦୁର୍ଭାବପ୍ରଲୟୌ ନସ୍ତ୍ୱତ୍ତ ଇତି ପରମମ୍ । କିମ୍ବ୍ରୂମସ୍ତବ ମହିମା ନାସ୍ତି ଯତୋ ବ୍ରହ୍ମହତ୍ୟାସ୍ତ୍ରୀହତ୍ୟା-ଗୁରୁହତ୍ୟାଦିମହାପାତକାତିପାତକାନାମେକାଧିକରଣଞ୍ଚ । ଜନସ୍ତଜ୍ଜଲକଣସମ୍ବନ୍ଧାଦିନୈବ ପୂତୋ ଭବତୀତି । ତଦ୍ଦର୍ଶନାଦେବ ପରମବ୍ରହ୍ମପଦପ୍ରାପ୍ତିଃ ଫଲମିତି ଚ ଯୋ ମହିମପରମାହ ସ ତତ୍ତତ୍ପାପଭାଗିତି ଯଥାର୍ଥବାଦଃ ॥

॥ ଇତି ବୃହଦ୍ଧର୍ମପୁରାଣାନ୍ତର୍ଗତେ ତୀର୍ଥଗଣୈଃ କୃତା ଗଙ୍ଗାସ୍ତୁତିଃ ସମ୍ପୂର୍ଣା ॥

॥ ବୃହଦ୍ଧର୍ମପୁରାଣମ୍ । ପୂର୍ୱଖଣ୍ଡଃ । ଗୁଣନିର୍ଣୟ ଅଧ୍ୟାୟଃ ୫। ୬୦-୯୧॥

 ଶ୍ରୀଗଙ୍ଗାସ୍ତୋତ୍ରମ୍  ଶ୍ରୀମଚ୍ଛଙ୍କରାଚାର୍ୟବିରଚିତଂ

https://ganja-upasana.blogspot.com/2025/02/blog-post_47.html