ଗଙ୍ଗାସ୍ତୋତ୍ରମ୍ ୫ ଶ୍ରୀଶିବରାମ ତ୍ରିପାଠୀ କୃତଂ

 ଗଙ୍ଗାସ୍ତୋତ୍ରମ୍ ୫

ଶ୍ରୀଗଣେଶାୟ ନମଃ ।
ଲୋକେ ପ୍ରତିଷ୍ଠା ଭବତୋ ଯଦେଷ୍ଟା ନେକ୍ଷ୍ୟା ତଦା ଜହ୍ୱନରେନ୍ଦ୍ରକନ୍ୟା ।
ନଗ୍ନଂ ବୃଷସ୍ଥଂ ପୁରୁଷଂ ବିଧାୟ କପାଲିନଂ ଭୈକ୍ଷଚରଂ କରୋତି ॥ ୧॥

ରଜୋଽଭିଭୂତା ରଜସା ବିଶୁଦ୍ଧାସ୍ତୈରେଜତେ ଜହୁର୍ରେନ୍ଦ୍ରକନ୍ୟେ?
କସ୍ୟୈ ନ ଶୁଦ୍ଧ୍ୟୈ ତବ ପଙ୍କଲେପଃ କଲେବରେ କର୍ମବଶାତ୍ସ୍ଥିତାନାମ୍ ॥ ୨॥

ମାତର୍ଜଲସ୍ୟ ପ୍ରକୃତିଃ ପ୍ରସିଦ୍ଧା ଶୀତେତି ଲୋକେ ତବ ତୋୟସଙ୍ଗାତ୍ ।
ପାପଂ ହି ଜନ୍ତୋର୍ଭବତି କ୍ଷଣେନ ଯଦ୍ଭସ୍ମସାତ୍ତନ୍ମମ ଚିତ୍ରମାସ୍ତେ ॥ ୩॥

ଯୋ ବିଷ୍ଣୁପାଦାବ୍ଜପରାଗସଙ୍ଗୋ ଯଶ୍ଚାପି ନିର୍ୱାଣଦପୂର୍ୱିହାରଃ ।
ଅଘଘ୍ନତା ଯା ଚ କଲିନ୍ଦଜାୟା ଏତତ୍ୱୟଂ ତ୍ୱତ୍ସଖିତାନିଦାନମ୍ ॥ ୪॥

ବିଧାୟ ସମ୍ଭେଦମଭେଦହେତୁଂ ସୂର୍ୟସ୍ୟ ପୁତ୍ର୍ୟା ସହ ତୀର୍ଥରାଜେ ।
ଯମାଧିକାରଂ ନୟସି ପ୍ରଶାନ୍ତିଂ ତତୋଽପି ନୀତିଜ୍ଞତୟା ନିତାନ୍ତମ୍ ॥ ୫॥

ସ୍ତୁବନ୍ତି ଗଙ୍ଗେ ଯମକିଙ୍କରାସ୍ତ୍ୱାଂ
ନିନ୍ଦନ୍ତି ବା ସ୍ୱାଧିକୃତେରପାୟାତ୍ ।
ଜାନେ ନ ତତ୍ତ୍ୱଂ ଜନନି ! ତ୍ୱଦୀୟଂ
ବିଧେହି ମୁକ୍ତଂ କିମୁ ସଂଶୟେନ ॥ ୬॥

ଅଧର୍ମଭୀରୁଃ ଶ୍ରିତଧର୍ମଭୀତିଃ କୁର୍ୱନ୍ୟଥାଶକ୍ତିମତି ସ୍ୱଧର୍ମମ୍ ।
ତତ୍ତ୍ୱାବବୋଧେନ ବିନାଽପି ବାଞ୍ଛନ୍ମୁକ୍ତିଂ ହି ସମ୍ଭେଦମହଂ ସ୍ମରାମି ॥ ୭॥

ସମ୍ଭେଦ ଏବଂ ମିଲିତା ସରସ୍ୱତୀ
ରକ୍ତା ମଦୀୟା ମମ ଶୁଦ୍ଧିହେତବେ ।
ଜାତା ତ୍ରିବେଣୀ ଗ୍ରଥନାଦିତଃ ପୃଥକ୍
ସ୍ତୋତୁଂ କଥଂ ଯାତି ପରଂ ହି ମାନୁଷମ୍ ॥ ୮॥

ଗିରେଃ ସକାଶାଦୁଦୟଂ ପ୍ରୟାତାଂ ଶିତିଚ୍ଛବିଚ୍ଛାଦିତଦିଗ୍ୱିଭାଗାମ୍ ।
ଯମପ୍ରସକ୍ତୋଽପି ଯମାତିଭୀରୁର୍ନମାମି ଗଙ୍ଗାଂ ଯମୁନାଂ ସ୍ୱମୁକ୍ତ୍ୟୈ ॥ ୯॥

ଗୌର୍ୟାଃ ସପତ୍ନୀକବିବର୍ଣିତାଂ ହି
ଲକ୍ଷ୍ମ୍ୟାଃ ସପତ୍ନୀମପି ସୁପ୍ରସିଦ୍ଧାମ୍ ।
ସମୁଦ୍ରୟୋଗେନ ମିଥଃ ସପତ୍ନୀଂ
ନମାମି ଗଙ୍ଗାଂ ଯମୁନା ସ୍ୱମୁକ୍ତ୍ୟୈ ॥ ୧୦॥

ନିପୀୟ ନୀରଂ ତବ ଦେବି ! ତୀରେ-
ସ୍ଥିତଃ କୁଟୀରେ ସୁଲଭାନ୍ନଭୋକ୍ତା ।
ତ୍ୟକ୍ତସ୍ପୃହଃ କେବଲମୋକ୍ଷକାଙ୍କ୍ଷୀ
ଧ୍ୱାଙ୍କ୍ଷୀବ ଲକ୍ଷ୍ମୀନୃପତେର୍ହି ତସ୍ୟ ॥ ୧୧॥

ସ୍ମୃତିଶତପରିଗୀତାଂସ୍ତ୍ୱଦ୍ଗୁଣାନ୍ଦେବି ! ଶୃଣ୍ୱନ୍
ବିଗତଶମନଭୀତିଃ ସ୍ୱୈରିତାମଭ୍ୟୁପେତଃ ।
ଯଦି ନିରୟମବେକ୍ଷେ କ୍ଷୀରମାସେବ୍ୟ ମାତଃ !
ତବ ସୁରଧୁନି ! ତଥ୍ୟଂ ବ୍ରୂହି କସ୍ୟାପରାଧଃ ! ॥ ୧୨॥

ଇତି ଶ୍ରୀଶିବରାମ ତ୍ରିପାଠୀ କୃତଂ ଗଙ୍ଗାସ୍ତୋତ୍ରଂ ସମ୍ପୂର୍ଣମ୍ ।

ଗଙ୍ଗାସ୍ତୋତ୍ରଂ ୬  ଶ୍ରୀଲକ୍ଷ୍ମଣସୋମୟାଜି ବିରଚିତଂ

https://ganja-upasana.blogspot.com/2025/02/blog-post_24.html